Engineer Rashid: జైల్లో ఉన్న ఇంజినీర్‌ రషీద్ ప్రమాణ స్వీకారానికి ఎన్‌ఐఏ అనుమతి

దిల్లీ: ఉగ్రనిధుల కేసు (terror-funding case) నిందితుడు ఇంజినీర్‌ రషీద్‌ (Engineer Rashid) ఇటీవల జరిగిన లోక్‌సభ ఎన్నికల్లో విజయం సాధించిన సంగతి తెలిసిందే. అతడు ఎంపీగా ప్రమాణస్వీకారం చేసేందుకు జాతీయ దర్యాప్తు సంస్థ (ఎన్‌ఐఏ) సమ్మతి తెలియజేసింది. దీనిపై దిల్లీ హైకోర్టు తుది ఆదేశాలు వెలువరించాల్సి ఉంది.

జమ్మూకశ్మీర్‌ (Jammu and Kashmir)కు చెందిన షేక్ అబ్దుల్‌ రషీద్‌ అలియాస్‌ ఇంజినీర్ రషీద్‌ బారాముల్లా నియోజకవర్గం నుంచి లోక్‌సభ ఎన్నికల్లో స్వతంత్రుడిగా పోటీ చేసి, విజయం సాధించారు. నేషనల్‌ కాన్ఫరెన్స్‌ నేత, మాజీ ముఖ్యమంత్రి ఒమర్‌ అబ్దుల్లాపై 2లక్షలకు పైగా ఓట్ల మెజార్టీతో విజయం సాధించారు. జమ్మూకశ్మీర్‌(Jammu and Kashmir)లో ఉగ్ర కార్యకలాపాలకు నిధులు సమకూర్చారన్న అభియోగాలపై 2019 ఆగస్టులో అరెస్టయ్యారు. ప్రస్తుతం అతడు జైల్లో ఉండటంతో మిగతావారితో పాటు 18వ లోక్‌సభ సభ్యుడిగా ప్రమాణం చేయలేపోయారు.

Lok Sabha Election Results: జైలు నుంచే ఎంపీగా గెలుపు.. లోక్‌సభకు వెళ్లొచ్చా..?

తన ప్రమాణస్వీకారం కోసం మధ్యంతర బెయిల్‌ కోరుతూ రషీద్‌ దిల్లీ హైకోర్టులో పిటిషన్ వేశారు. మనీలాండరింగ్ కేసులో తిహాడ్‌ జైల్లో ఉన్న సమయంలో పార్లమెంట్‌కు వచ్చి, ఆప్‌ నేత సంజయ్‌సింగ్ రాజ్యసభ ఎంపీగా ప్రమాణం చేసిన విషయాన్ని ప్రస్తావించారు. దీనిపై స్పందించాలని, జులై ఒకటిలోగా సమాధానం ఇవ్వాలని ఎన్‌ఐఏను కోర్టు ఆదేశించింది. ఈ క్రమంలోనే ఎన్‌ఐఏ తన సమ్మతిని తెలియజేసింది. దీనిపై రేపు కోర్టు తుది తీర్పు ఇవ్వనుంది. ఇదిలాఉంటే.. పంజాబ్‌ (Punjab)లోని ఖడూర్‌ సాహిబ్‌ స్థానం నుంచి వేర్పాటువాది అమృత్‌పాల్‌ సింగ్‌ గెలుపొందిన సంగతి తెలిసిందే. అతడు కూడా ఇంకా ప్రమాణ స్వీకారం చేయలేదు. అతడు కూడా జైల్లోనే ఉన్నాడు.