అడ్డా కూలీలకు గౌరవమివ్వాలి

వారికి పూర్తి హక్కులను కల్పించాలి 
అది నా జీవిత లక్ష్యం: రాహుల్‌ 

దిల్లీ: కాయ కష్టం చేసే అడ్డా కూలీలకు పూర్తి హక్కులను కల్పించాలని, వారికి తగిన గౌరవం ఇవ్వాలని, అది తన జీవిత లక్ష్యమని కాంగ్రెస్‌ అగ్ర నేత, లోక్‌సభలో విపక్ష నేత రాహుల్‌ గాంధీ పేర్కొన్నారు. దిల్లీలోని గురు తేగ్‌ బహదూర్‌ నగర్‌లో (జీటీబీ నగర్‌) గురువారం ఆయన భవన నిర్మాణ కార్మికులైన అడ్డా కూలీలను కలిశారు. వారి సమస్యలను విన్నారు. భవన నిర్మాణ ప్రదేశంలో తాపీ పట్టి కొద్దిసేపు వారితో కలిసి పని చేశారు. ఆ తర్వాత తన వాట్సప్‌ ఛానల్‌లో ఆ చిత్రాలను పంచుకున్నారు. అడ్డా కూలీలను కలిశాక పని ప్రదేశంలో వారికి ఏ మాత్రం గౌరవం లేదని తాను గతంలో అన్న మాటలు వాస్తవమేనని నిర్ధారణ అయ్యాయని రాహుల్‌ గాంధీ పేర్కొన్నారు.