సుప్రీంకు క్షమాపణ చెప్పిన ఐఎంయే అధ్యక్షుడు

దిల్లీ: పతంజలి ఆయుర్వేద సంస్థ ప్రకటనల కేసు విచారణ సందర్భంగా సుప్రీంకోర్టు వ్యక్తపరిచిన అభిప్రాయంపై చేసిన వ్యాఖ్యలకు ‘భారత వైద్య సంఘం’ (ఐఎంయే) అధ్యక్షుడు డాక్టర్‌ ఆర్‌.వి.అశోకన్‌ గురువారం బహిరంగ క్షమాపణ చెప్పారు. కోర్టుకు వ్యతిరేకంగా వ్యాఖ్యానించినందుకు బేషరతు క్షమాపణ కోరుతూ ప్రమాణపత్రం దాఖలుచేశారు. పతంజలి కేసులో ఐఎంయే కూడా ఒక కక్షిదారుగా ఉంది. ‘తప్పుడు పద్ధతులు అవలంబిస్తున్న తీరుపై మా సంస్థకూ ఆందోళన ఉంది. సుప్రీంకోర్టు గౌరవానికి భంగం కలిగించాలన్న ఉద్దేశం నాకు ఎన్నడూ లేదు. ఎప్పటికప్పుడు సమాచారాన్ని తాజాపర్చడం, నైతిక అభ్యాసాలను ప్రోత్సహించడం మా ప్రధాన కార్యకలాపాల్లో ఒకటి’ అని డాక్టర్‌ అశోకన్‌ పేర్కొన్నారు.