మోదీ ‘పరీక్షా పే చర్చ’ వర్చువల్‌గా పునఃసృష్టి

ఎన్‌సీఈఆర్‌టీ కసరత్తు 

దిల్లీ: ప్రధానమంత్రి నరేంద్ర మోదీ ఏటా నిర్వహిస్తున్న ‘పరీక్షా పే చర్చ’ కార్యక్రమాన్ని ఒక ప్రత్యేక పోర్టల్‌ రూపంలో వర్చువల్‌గా పునఃసృష్టించడానికి ఎన్‌సీఈఆర్‌టీ కసరత్తు ప్రారంభించింది. పోటీ పరీక్షల్లో దేశవ్యాప్తంగా అవకతవకలు జరిగాయనే ఆరోపణలు ఇటీవల వెల్లువెత్తడంతో ఈ పరీక్షల విశ్వసనీయతపై ప్రతిపక్షాలు ప్రశ్నలు లేవనెత్తుతున్నాయి. నీట్‌ వ్యవహారంపైనా ‘పరీక్షా పే చర్చ’ లాంటి కార్యక్రమాన్ని ప్రధాని మోదీ నిర్వహించాలని డిమాండ్‌ చేస్తున్నాయి. ఈ నేపథ్యంలో ప్రత్యేక పోర్టల్‌ రూపొందించేందుకు వెండర్లను గుర్తించేందుకుగాను ఎన్‌సీఆర్‌టీ ప్రకటన విడుదల చేసింది. ‘‘ఈ పోర్టల్‌ను విద్యార్థులు తమ ఇళ్ల నుంచే వీక్షించుకోవచ్చు. అందులో ప్రధాని మోదీ, మంత్రుల ప్రసంగాలు, విద్యార్థుల సృజనాత్మక ఆవిష్కరణలు, ప్రయోగాలు, ప్రాజెక్టులను నిక్షిప్తం చేస్తాం. ఈ వర్చువల్‌ ఫ్లాట్‌ఫామ్‌లో ఎగ్జిబిషన్‌ హాలు, ఆడిటోరియం, సెల్ఫీ, క్విజ్‌ జోన్లు, లీడర్‌ బోర్డులు ఉంటాయి. విద్యార్థులు ఇంటరాక్టివ్‌ 2డీ/3డీ విధానంలో ప్రధానితో సెల్ఫీలు తీసుకోవచ్చు. వాటిని డౌన్‌లోడ్‌ చేసుకొని, సోషల్‌ మీడియాలోనూ పోస్టు చేయవచ్చు. వర్చువల్‌ ఆడిటోరియంలో విద్యార్థులకు దిశానిర్దేశం చేసేలా చర్చలు, అవగాహన సదస్సులు జరుగుతాయి’’ అని ఎన్‌సీఈఆర్‌టీ వెల్లడించింది. ఈ పోర్టల్‌ను ఏడాదికి కోటిమంది వీక్షించే అవకాశం ఉంటుందని తెలిపింది.