సూరజ్‌ పాలే భోలే బాబా!

లైంగిక వేధింపుల కేసులో జైలుకెళ్లిన మాజీ పోలీసు
బయటకొచ్చాక ఆధ్యాత్మివేత్త అవతారం
యూపీలో మెయిన్‌పురిలో భారీ ఆశ్రమం

కాస్‌గంజ్‌: అతడు తన చేతితో నీరు ఇస్తే సమస్యలు తీరుతాయట.. అతడు అడుగుపెట్టిన చోట మట్టిని తాకినా ఆశీర్వాదం అట.. ఉత్తరప్రదేశ్‌కు చెందిన ‘భోలే బాబా’ను అనుసరించేవారి నమ్మిక ఇది. అందుకే ఆయన పాద ధూళి కోసం ఎగబడిన భక్తులు దురదృష్టవశాత్తూ అదే మట్టిలో కలిసిపోయారు. యావత్‌ దేశాన్ని దిగ్భ్రాంతికి గురిచేసిన హాథ్రస్‌ తొక్కిసలాట ఘటనతో ఈ బాబా పేరు ఒక్కసారిగా మార్మోగింది. ఇంతకీ ఎవరాయన? పోలీసు శాఖలో పనిచేసి.. లైంగిక వేధింపుల కేసులో జైలుకెళ్లిన వ్యక్తి బాబాగా ఎలా మారాడు?

18 ఏళ్ల పాటు పోలీసుశాఖలో..

యూపీకి చెందిన నారాయణ్‌ సాకార్‌ హరి.. సాకార్‌ విశ్వ హరి, ‘భోలే బాబా’గా ప్రసిద్ధి. అతడి అసలు పేరు సూరజ్‌ పాల్‌. కాస్‌గంజ్‌ జిల్లా పటియాలి తహసీల్‌లోని బహదూర్‌నగర్‌ గ్రామానికి చెందిన అతడు.. బాల్యంలో తండ్రితో కలిసి వ్యవసాయం చేసేవాడు. చదువు పూర్తయిన తర్వాత రాష్ట్ర పోలీసు శాఖలో చేరి 18 ఏళ్ల పాటు పనిచేసినట్లు పోలీసు వర్గాలు చెబుతున్నాయి. తాను ఇంటెలిజెన్స్‌ బ్యూరోలో పనిచేసినట్లు చెప్పుకునేవాడు. ఆ తర్వాత వీఆర్‌ఎస్‌ తీసుకుని ఆధ్యాత్మిక బాట పట్టినట్లు ప్రచారం చేసుకున్నాడు. అతనికి సంతానం లేదు. దత్తత తీసుకున్న కుమార్తె 16-17 సంవత్సరాల క్రితం మరణించింది. ఎవరి నుంచి ఎప్పుడూ చందాలు కోరడని చుట్టుపక్కల గ్రామాలవారు పేర్కొంటుంటారు. ఆయనకు స్వచ్ఛందంగానే విరాళాలు అందుతుంటాయంటారు. భగవంతుడి గురించే ఆయన ఎప్పుడూ బోధిస్తుంటారని ఆయన గ్రామంలోని మహిళలు పేర్కొంటారు. 

‘సమాజ హితం కోసం ఈ మార్గం’

అయితే, పోలీసు శాఖ నుంచి బయటకు వచ్చిన తర్వాత సూరజ్‌ పాల్‌ కొన్ని కేసులు ఎదుర్కొన్నట్లు యూపీ పోలీసు వర్గాలు తెలిపాయి. మహిళలపై లైంగిక వేధింపులకు సంబంధించిన కేసులో 1997లో అరెస్టయి కొన్నాళ్ల పాటు జైలు శిక్ష కూడా అనుభవించాడట..! ఆ తర్వాత బయటకు వచ్చి తన పేరును ‘సాకార్‌ విశ్వ హరి బాబా’గా మార్చుకున్నాడు. అనేక ప్రాంతాల్లో ఆశ్రమాలను నిర్వహిస్తున్నాడు. వాటిలో మెయిన్‌పురిలో ఆశ్రమం అతిపెద్దది. తనకు గురువు ఎవరూ లేరని, కేవలం సమాజహితం కోసమే ఈ మార్గాన్ని ఎంచుకున్నట్లు చెబుతుంటాడు. తనను తాను భగవంతుని అవతారంగా చెప్పుకుంటాడు.

నీళ్ల కోసం భక్తుల క్యూ.. 

అలీగఢ్‌తోపాటు హాథ్రస్‌ జిల్లాలోని పలు ప్రాంతాల్లో ప్రతి మంగళవారం సత్సంగ్‌ పేరుతో ఆధ్యాత్మిక కార్యక్రమాలు చేపడుతుంటారు. వేల సంఖ్యలో భక్తులు హాజరవుతుంటారు. కొన్నిసార్లు లక్షల్లో జనం వస్తుంటారు. ఉత్తర్‌ప్రదేశ్‌ కాకుండా ఉత్తరాఖండ్, హరియాణా, రాజస్థాన్, దిల్లీతోపాటు దేశవ్యాప్తంగా ‘భోలే బాబా’కు లక్షల మంది అనుచరులు ఉన్నారు. ఇతడి కార్యక్రమాలను నిర్వహించే వారు నల్లటి దుస్తులు ధరించి ఎన్‌ఎస్‌జీ కమాండో మాదిరిగా ఉంటారు. వీరిని ‘సేవాదర్‌ ఆర్మీ’గా పిలుస్తుంటారు. సాధారణంగా ఆశ్రమంలో నిర్వహించే సత్సంగ్‌ కార్యక్రమాల్లో భక్తులకు నీటిని పంపిణీ చేస్తుంటారు. అవి తాగితే సమస్యలన్నీ తొలగిపోతాయనే విశ్వాసం ప్రజల్లో ఉంది. అతడి ఆశ్రమంలో ఓ చేతిపంపు ఉంటుంది. దాన్ని పవిత్ర జలంగా భావించి ఆ నీరు తీసుకునేందుకు భక్తులు క్యూ కడుతుంటారు. భోలే బాబా ఎప్పుడూ తెల్లటి సూట్‌ ధరించి టోపీ పెట్టుకుని కన్పిస్తాడు. ఏ కార్యక్రమానికి వచ్చినా భార్య వెంట ఉండాల్సిందే. కొవిడ్‌ సమయంలో అతడి పేరు తొలిసారిగా దేశమంతా వినిపించింది.