రుతుపవనాల సమయంలోనూ పెరుగుతున్న ఉష్ణోగ్రతలు

దేశ జీడీపీపై ప్రభావం చూపే అవకాశం 

దిల్లీ: రుతుపవనాల సమయంలో తీవ్రమైన తేమతో కూడిన వేడికి గురవుతున్న వారి సంఖ్య భారత్‌లో క్రమంగా పెరుగుతోందని తాజా అధ్యయనం పేర్కొంది. ఈ రకమైన వాతావరణ ప్రభావానికి గురవతున్న వారి సంఖ్య 1951-2020 మధ్యకాలంలో 67 కోట్లకు చేరిందని తెలిపింది. ఈ అధ్యయనంలో అమెరికాలోని కార్నెల్‌ యూనివర్సిటీ శాస్త్రవేత్తలు పాల్గొన్నారు. రుతుపవనాల కాలంలో తేమతో కూడిన ఉష్ణోగ్రతల పెరగడం.. ఉత్పాదకతపై తీవ్రప్రభావం చూపుతోందని అధ్యయనం ఆందోళన వ్యక్తం చేసింది. సింధు-గంగా మైదాన ప్రాంతం ఈ తరహా వాతావరణానికి ఎక్కువ ప్రభావితమవుతోందని తెలిపింది. రుతుపవనాల సమయంలో వేడి పరిస్థితులు ప్రజల ఆరోగ్యానికి, కార్మికుల ఉత్పాదకతకు సవాలుగా నిలిచాయని పేర్కొంది. కార్మికుల పనిగంటలను మార్చాల్సిన అవసరం ఉందని తెలిపింది. ‘‘గ్లోబల్‌ వార్మింగ్‌ కారణంగా 3 డిగ్రీల సెల్సియస్‌ ఉష్ణోగ్రత పెరిగినా కార్మికుల ఉత్పాదకత 7 శాతం తగ్గుతుంది. తద్వారా భారత్‌ స్థూల దేశీయోత్పత్తి (జీడీపీ) 4 శాతం తగ్గే అవకాశం ఉంది’’ అని అధ్యయన రచయితలు తెలిపారు.