గజరాజులకు అదిరిపోయే డెన్‌

భువనేశ్వర్, న్యూస్‌టుడే: ఆ ఆరు ఏనుగులకూ అక్కడ రాజభోగాలే... ఉదయమే కాసేపు నడక, వ్యాయామం. 8:30కు అరటి పండ్లు, కొబ్బరి బొండాలు, క్యారెట్, చెరకు గడలు, పుచ్చకాయలతో టిఫిన్‌. మధ్యాహ్నం గంటన్నర సేపు జలకాలాట. తర్వాత గోధుమలు, చోళ్లు, మొక్కజొన్నల పొడి, ఉలవలతో ఆహారం. మళ్లీ రాత్రికీ ఇదే మెనూ. రాత్రంతా నెమరువేయడానికి అరటిపళ్లు, అరటి బోదెలూ... ఒడిశాలోని భువనేశ్వర్‌ సమీపంలో ఉన్న చందకా అభయారణ్యంలో ఏనుగుల వైభోగం ఇది. మంద నుంచి తప్పిపోయిన ఈ ఆరు ఏనుగులను అధికారులు చేరదీసి ఇలా పోషిస్తున్నారు. ఈ అభయారణ్యం చుట్టు పక్కల పెరుగుతున్న పులుల   కదలికలను పసిగట్టడం, గ్రామాల మీద పడే ఏనుగుల గుంపులను అడవుల్లోకి తరమడానికి వీటికి  శిక్షణ ఇస్తున్నారు. ఒక్కో గజరాజుకు ఆహారం ఖర్చు రోజుకు రూ.1,500 అవుతోందని అధికారులు తెలిపారు.