ఎమర్జెన్సీపై ఓంబిర్లా వ్యాఖ్యలు సరికాదు

స్పీకర్‌ స్థాయి వ్యక్తి రాజకీయ ప్రకటనలు చేయకూడదు: పవార్‌

కొల్హాపుర్‌: ‘ఎమర్జెన్సీ’ అంశంపై లోక్‌సభ స్పీకర్‌ ఓం బిర్లా చేసిన వ్యాఖ్యలపై నేషనలిస్ట్‌ కాంగ్రెస్‌ పార్టీ (ఎస్పీ) అధినేత శరద్‌ పవార్‌ స్పందించారు. సభాపతి స్థాయిలో ఉన్న వ్యక్తి ఆ మాటలు అనడం సరికాదని పేర్కొన్నారు.  ‘‘లోక్‌సభ స్పీకర్‌ పదవిలో ఉన్న ఓం బిర్లా అసందర్భంగా ఎమర్జెన్సీ గురించి ప్రస్తావించారు. ఇది ఆయన స్థాయికి ఏమాత్రం తగదు. ఆ చీకటి అధ్యాయం ముగిసి 50 ఏళ్లు కావొస్తోంది. ఇందిరాగాంధీ ఇప్పుడు లేరు. అయినా ఈ అంశాన్ని స్పీకర్‌ ఎందుకు ప్రస్తావిస్తున్నారు? స్పీకర్‌ పాత్ర.. రాజకీయ ప్రకటనలు చేయడమా..? ఇది ఏమాత్రం ఆమోదయోగ్యం కాదు’’ అని శరద్‌ పవార్‌ అన్నారు. బుధవారం లోక్‌సభలో ‘అత్యయిక పరిస్థితి’ని ఖండిస్తూ నాటి ప్రధాని ఇందిరాగాంధీ రాజ్యాంగంపై దాడి చేశారంటూ ఓ తీర్మానాన్ని స్పీకర్‌ చదివిన సంగతి తెలిసిందే.  లోక్‌సభలో ప్రతిపక్ష నేతగా కాంగ్రెస్‌ అగ్ర నాయకుడు రాహుల్‌గాంధీని ఎన్నుకోవడాన్ని పవార్‌ స్వాగతించారు. రాహుల్‌ తన బాధ్యతలను సమర్థవంతంగా నిర్వహించగలరంటూ విశ్వాసం వ్యక్తంచేశారు. ‘‘పార్లమెంట్‌లో భాజపాకు మెజారిటీ లేదనడంలో ఏ సందేహం లేదు. బిహార్, ఆంధ్రప్రదేశ్‌ ముఖ్యమంత్రులు నీతీశ్‌కుమార్, చంద్రబాబు మద్దతు లేకుంటే కేంద్రంలో ప్రభుత్వాన్ని ఏర్పాటుచేయలేకపోయేవారు. దీన్ని ఎంతగా వారు దాయాలనుకున్నా.. వాస్తవం స్పష్టంగా కనిపిస్తోంది. భారత ప్రజల నుంచి వారికి స్పష్టమైన మద్దతు లేదు’’ అని తెలిపారు.