జమ్మూ కశ్మీర్‌లో కాల్పులు.. ముగ్గురు ఉగ్రవాదుల హతం

ఇంటర్నెట్‌ డెస్క్‌: జమ్మూ కశ్మీర్‌లోని దోడా జిల్లా అటవీ ప్రాంతంలో బుధవారం సైనికులకు, ఉగ్రవాదులకు మధ్య జరిగిన కాల్పుల్లో ముగ్గురు దుండగులు హతమయ్యారు. వారంతా పాకిస్థాన్‌కు చెందిన జైషే మొహమ్మద్‌కు చెందిన వారిగా ఉన్నతాధికారులు అనుమానిస్తున్నారు. ఇటీవల జూన్‌ 11, 12వ తేదీల్లో ఉగ్రవాదులు దాడులు జరిపిన నేపథ్యంలో స్థానిక పోలీసులు, ఆర్మీ సిబ్బంది, సీఆర్‌పీఎఫ్‌ దళాలు సంయుక్తంగా ముందస్తు తనిఖీలు చేపట్టాయి. ఇందులో భాగంగా బుధవారం ఉదయం బజాద్‌ అనే గ్రామంలో సోదాలు నిర్వహిస్తుండగా.. ఒక్కసారిగా ఓ మట్టి ఇంట్లో నక్కిన ఉగ్రవాదులు కాల్పులకు దిగారు. వెంటనే అప్రమత్తమైన మన భద్రతా బృందాలు ఎదురు కాల్పులు ప్రారంభించాయి. ఈ క్రమంలో ముగ్గురు ముష్కరులు హతమైనట్లు ఉన్నతాధికారులు వెల్లడించారు. వారి వద్ద నుంచి రెండు ఎం4 కార్బైన్లు, ఏకే సిరీస్‌ రైఫిళ్లు, మందు గుండు సామగ్రిని స్వాధీనం చేసుకున్నామన్నారు.