పురాతన భవంతి కూలుస్తుండగా బయటపడ్డ బంగారు నాణేలు

చోరీ చేసిన కాంట్రాక్టరు, కూలీల అరెస్టు

నవసారీ: ఓ పురాతన భవంతిని కూలుస్తుండగా బ్రిటిష్‌ కాలం(1922) నాటి బంగారు నాణేలు బయటపడ్డాయి. కింగ్‌ జార్జ్‌-5 బొమ్మ ముద్రించి ఉన్న ఆ విలువైన నాణేలను కూల్చివేత పనులు చేపట్టిన కాంట్రాక్టరు, నలుగురు కూలీలు ఇంటి యజమానికి తెలియకుండా చోరీ చేశారు. దీనిపై యజమాని గతేడాది అక్టోబరులోనే ఫిర్యాదు చేయగా పోలీసులు తాజాగా నిందితులను అరెస్టు చేసి కోర్టు ఆదేశాల మేరకు రిమాండుకు తరలించారు. గుజరాత్‌లోని నవసారీ జిల్లా బిలిమోరాలో ఈ ఘటన చోటుచేసుకుంది. బ్రిటన్‌లో నివసిస్తున్న హవబెన్‌ బలియా అనే ప్రవాస భారతీయుడు.. సర్ఫరాజ్‌ కరదియా అనే కాంట్రాక్టరుకు ఇల్లు కూల్చే పని అప్పగించారు. ఆయన మధ్యప్రదేశ్‌కు చెందిన నలుగురు కూలీలను తీసుకొచ్చి దానిని కూల్చివేస్తుండగా.. బంగారు నాణేలు బయటపడటంతో వాటిని తీసుకెళ్లిపోయారు. వారి నుంచి పోలీసులు రూ.92 లక్షల విలువైన 199 నాణేలను స్వాధీనం చేసుకున్నారు. అయితే దర్యాప్తు సమయంలో తమ నుంచి కొన్ని నాణేలను మధ్యప్రదేశ్‌కు చెందిన నలుగురు పోలీసులు తీసుకున్నారని ఓ కూలీ ఫిర్యాదు చేయడంతో వారిని కూడా అరెస్టు చేశారు.