Madras HC: ఎంఎస్‌ ధోనీ వేసిన కోర్టు ధిక్కార కేసులో.. ఐపీఎస్‌ అధికారికి జైలుశిక్ష

చెన్నై (ఆర్కేనగర్‌), న్యూస్‌టుడే: ప్రముఖ క్రికెటర్‌ ఎంఎస్‌ ధోనీ వేసిన కోర్టుధిక్కార కేసులో ఐపీఎస్‌ అధికారికి 15 రోజుల జైలుశిక్ష విధిస్తూ మద్రాసు హైకోర్టు ఆదేశించింది. 2013లో జరిగిన ఐపీఎల్‌ మ్యాచ్‌లో ఫిక్సింగ్‌ ఆరోపణల గురించి టీవీ చర్చలో తనకు వ్యతిరేకంగా అనుచిత వ్యాఖ్యలు చేశారంటూ.. ఐపీఎస్‌ అధికారి సంపత్‌కుమార్‌, జీ మీడియా కార్పొరేషన్‌పై ధోనీ 2014లో మద్రాసు హైకోర్టులో కేసు వేశారు. పరువునష్టం కలిగించినందుకు రూ.100 కోట్ల పరిహారం ఇచ్చేలా ఆదేశించాలని కోరారు. ఐపీఎస్‌ అధికారి సంపత్‌కుమార్‌ తరఫున తగిన వివరణ ఇవ్వకపోవడంతో కోర్టుధిక్కార చర్యలు చేపట్టాలని ధోనీ పిటిషన్‌ వేశారు. ఇది న్యాయమూర్తులు జస్టిస్‌ ఎస్‌ఎస్‌ సుందర్‌, జస్టిస్‌ సుందర్‌మోహన్‌ ఎదుట విచారణకు వచ్చింది. సమయం ఇచ్చినా తగిన వివరణ ఇవ్వకపోవడంతో 15రోజుల పాటు జైలుశిక్ష విధిస్తూ ఆదేశించారు. శిక్షను నిలిపి ఉంచాలని ఐపీఎస్‌ అధికారి తరఫున న్యాయవాది విన్నవించగా అంగీకరించారు. అప్పీలు చేసుకునేందుకు వీలుగా 30 రోజుల పాటు శిక్షను నిలిపివేశారు.