Tragedy: జలపాతంలో మునిగి మహిళ, ఇద్దరు చిన్నారుల దుర్మరణం

మరో ఇద్దరు చిన్నారుల గల్లంతు
లోనావాలాలోని భూసీ డ్యామ్‌ సమీపంలో ఘటన

పుణె: మహారాష్ట్రలోని పుణె జిల్లా లోనావాలా ప్రాంతంలోని భూసీ డ్యామ్‌ బ్యాక్‌వాటర్‌ సమీపంలోని జలపాతంలో మునిగి ఓ మహిళ, ఇద్దరు చిన్నారులు మరణించారు. నాలుగేళ్ల నుంచి తొమ్మిదేళ్ల మధ్య వయసున్న ఇద్దరు చిన్నారులు గల్లంతయ్యారు. ఆదివారం మధ్యాహ్నం 12.30 గంటల సమయంలో కుటుంబమంతా విహారయాత్ర సంబరంలో ఉండగా ఈ ప్రమాదం సంభవించిందని పోలీసులు తెలిపారు. ఘటన అనంతరం గాలింపు చర్యలు చేపట్టినట్లు పుణె గ్రామీణ ఎస్పీ పంకజ్‌ దేశ్‌ముఖ్‌ తెలిపారు. ‘‘మేం 36 ఏళ్ల మహిళ, 13 ఏళ్లు, 8 ఏళ్ల వయసున్న ఇద్దరు బాలికల మృతదేహాలను గుర్తించాం. 9 ఏళ్ల బాలిక, నాలుగేళ్ల బాలుడి కోసం గాలిస్తున్నాం. వీరంతా ఒకే కుటుంబానికి చెందినవారని, భూసీ డ్యామ్‌కు 2 కిలోమీటర్ల దూరంలోని జలపాతంలో కాలు జారి పడిపోయి జలాశయం దిగువ ప్రాంతంలో మునిగిపోయారు’’ అని వివరించారు. ‘‘హడప్సర్‌ ప్రాంతానికి చెందిన అన్సారీ కుటుంబం విహారయాత్ర కోసం భూసీ డ్యామ్‌కు వచ్చింది. అనంతరం జలపాతంలోకి వెళ్లారు. ఆ ప్రాంతంలో భారీ వర్షం కురవడంతో ప్రవాహం పెరిగిన సంగతి గమనించలేదు. అనంతరం ప్రవాహం ఉద్ధృతికి కొట్టుకుపోయారు. చీకటి పడడంతో గాలింపు చర్యలు నిలిపివేశాం. సోమవారం ఉదయం తిరిగి ప్రారంభిస్తాం’’ అని లోనావాలా పోలీస్‌స్టేషన్‌ సిబ్బంది తెలిపారు.