CBI: ‘యూజీసీ-నెట్‌’ అవకతవకలపై దర్యాప్తు.. సీబీఐ బృందంపై స్థానికుల దాడి!

పట్నా: ‘యూజీసీ-నెట్‌ (UGC-NET)’ పరీక్షలో అవకతవకలపై దర్యాప్తులో భాగంగా బిహార్‌లోని నవాదాకు వెళ్లిన సీబీఐ (CBI) బృందంపై స్థానికులు దాడికి పాల్పడటం కలకలం రేపింది. దర్యాప్తు సంస్థ ఫిర్యాదు మేరకు ఈ కేసులో నలుగురిని అరెస్టు చేసినట్లు పోలీసులు ఆదివారం వెల్లడించారు.

యూజీసీ- నెట్‌ పరీక్ష పేపర్‌ లీకేజీ వ్యవహారంపై కేంద్ర విద్యామంత్రిత్వశాఖ సూచన మేరకు సీబీఐ గురువారం ఎఫ్ఐఆర్ నమోదు చేసింది. దర్యాప్తులో భాగంగా అధికారుల బృందం నవాదాలోని కసియాడీహ్‌ గ్రామానికి వెళ్లింది. ఈ క్రమంలోనే పెద్దఎత్తున స్థానికులు సీబీఐ వాహనాలను చుట్టుముట్టారు. అధికారులపై దౌర్జన్యానికి దిగారు. దీంతో అధికారులు వెంటనే స్థానిక పోలీస్‌లకు సమాచారం అందించారు. ఈ క్రమంలోనే రంగంలోకి దిగిన పోలీసులు.. వారిని చెదరగొట్టారు. ప్రభుత్వ కార్యకలాపాలకు అంతరాయం కలిగించడం, దాడి చేయడం వంటి ఆరోపణలపై కేసు నమోదు చేసి, నలుగురిని అరెస్టు చేశారు.

ముగిసిన నీట్‌ రీ-ఎగ్జామ్‌.. దాదాపు సగం మంది గైర్హాజరు

దేశంలోని యూనివర్సిటీల్లో లెక్చరర్షిప్ (అసిస్టెంట్ ప్రొఫెసర్), జూనియర్ రీసెర్చ్ ఫెలోషిప్, పీహెచ్‌డీలలో ప్రవేశాలకు కోసం ఈ నెల జూన్‌ 18న యూజీసీ నెట్‌ పరీక్ష నిర్వహించారు. అయితే.. ఇందులో అవకతవకలు జరిగినట్టు యూజీసీ నిర్ధారణ మేరకు దాన్ని రద్దు చేశారు. ఈ కేసును సీబీఐకి అప్పగించారు.