NEET Row: నీట్‌ వివాదం.. విద్యాశాఖ మంత్రి రాజీనామాకు ఆప్‌ డిమాండ్‌

దిల్లీ: వైద్య విద్యా కోర్సుల్లో ప్రవేశాలకు నిర్వహించిన నీట్‌ పరీక్ష (NEET 2024)లో అక్రమాలు జరిగాయంటూ విపక్షాలు తీవ్రస్థాయిలో మండిపడుతున్నాయి. ఈ వ్యవహారంపై ఆప్‌  దేశవ్యాప్త నిరసనలు చేపట్టింది. తాజాగా ఆ పార్టీ ఎంపీ సందీప్‌ పాఠక్‌ బుధవారం మీడియాతో మాట్లాడారు. పేపర్‌ లీకేజీలను భాజపా వ్యవస్థీకృతం చేస్తోందని, నీట్‌ అక్రమాలకు బాధ్యత వహిస్తూ కేంద్ర విద్యాశాఖ మంత్రి తన పదవికి రాజీనామా చేయాలని డిమాండ్‌ చేశారు.

నిను వీడని నీడను నేనే: భర్తను చంపేందుకు ప్లాన్‌-ఏ, బీ అమలు..!

నీట్‌ పరీక్షకు కొద్ది రోజుల ముందే భారీ అవినీతి జరిగిందన్న ఆయన.. ఈ దేశానికి నీట్‌ పరీక్ష ఎంతో కీలకమైనదన్నారు. వైద్య కళాశాల్లో అండర్‌ గ్రాడ్యుయేట్‌ కోర్సుల్లో ప్రవేశాలన్నీ ఈ పరీక్ష ద్వారానే చేపడతారని గుర్తు చేశారు. దాదాపు లక్ష సీట్లు ఉంటే.. దేశవ్యాప్తంగా 24లక్షల మంది విద్యార్థులు పోటీ పడ్డారన్నారు. విద్యార్థులు ఎంతో కష్టపడి చదివి ప్రిపేర్‌ అయ్యారని.. ఈ ప్రక్రియలో వారి కుటుంబాలు సైతం భాగస్వాములయ్యాయన్నారు. ఈ వ్యవహారాన్ని ఆప్‌ రాజకీయం చేయదలచుకోలేదని చెప్పిన పాఠక్‌.. దీనిపై ప్రధాని నరేంద్ర మోదీ దీనిపై కచ్చితంగా స్పందించాలని కోరారు. కేంద్ర విద్యాశాఖమంత్రిని సస్పెండ్‌ చేయాలి లేదా సంబంధిత మంత్రి తనకు తానుగా రాజీనామా చేయాలని డిమాండ్‌ చేశారు.