Kanipakam: కాణిపాకంలో వైభవంగా మహా కుంభాభిషేకం

కాణిపాకం: చిత్తూరు జిల్లా కాణిపాకం స్వయంభూ శ్రీ వరసిద్ధి వినాయక స్వామి వారి నూతన ఆలయ మహా కుంభాభిషేకం ఆదివారం ఉదయం వైభవంగా జరిగింది. వివిధ రాష్ట్రాల నుంచి తరలివచ్చిన వేలాది మంది భక్తుల నడుమ ఆలయ అర్చకులు శాస్త్రోక్తంగా కుంభాభిషేకాన్ని నిర్వహించారు. అనంతరం స్వామివారి దర్శనం కల్పించారు. 9నెలల తరువాత స్వామి వారి మూలవిరాట్ దర్శనానికి భక్తులు పోటెత్తారు.

ఈ కార్యక్రమానికి ఏపీ ఉపముఖ్యమంత్రి నారాయణస్వామి, మంత్రులు పెద్దిరెడ్డి రామచంద్రారెడ్డి, ఆర్కే రోజా, దేవాదాయశాఖ కమిషనర్‌ హరిజవహర్‌లాల్‌, వేలూరు గోల్డెన్‌ టెంపుల్‌ పీఠాధిపతి నారాయణి అమ్మణ్‌, పూతలపట్టు ఎమ్మెల్యే ఎం.ఎస్ బాబు, జిల్లా కలెక్టర్‌ హరినారాయణన్‌, ఎస్పీ రిశాంత్‌ రెడ్డి, ఆలయ పాలక మండలి ఛైర్మన్‌ అగరం మోహన్‌రెడ్డి, ఈవో సురేశ్‌బాబు, ఆలయ నిర్మాణ దాతలు ఐకా రవి, గుత్తికొండ శ్రీనివాస్‌, సమన్వయకర్త రామకృష్ణ ప్రసాద్‌, ఇతర ప్రముఖులు పాల్గొన్నారు.