ప్రమాద వంతెన... ప్రయాణ యాతన!

ఈనాడు కడప,, న్యూస్‌టుడే, బద్వేలు:  పోరుమామిళ్ల - మైదుకూరు ప్రధాన రహదారిలోని వంకమర్రి సగిలేరు వంతెన శిథిలావస్థకు చేరింది. కాంక్రీటు లేచి గుంతలేర్పడ్డాయి. ఈ మార్గంలో బెంగళూరు, చెన్నై తెలంగాణ రాష్ట్రాలకే కాకుండా రాష్ట్ర రాజధాని అమరావతి, విజయవాడ, గుంటూరు, పుణ్యక్షేత్రాలైన బ్రహ్మంగారిమఠం, తిరుపతి, ఒంటిమిట్ట క్షేత్రాలకు నిత్యం వేల సంఖ్యలో వాహనాలు రాకపోకలు సాగిస్తుంటాయి. ఇవి రాకపోకలు సాగించేటప్పుడు వంతెన అదురుతుండడంతో కూలిపోతుందేమోనని వాహనచోదకులు భయాందోళనకు గురవుతున్నారు. వంతెన నిర్మించి నలభై ఏళ్లు కావడంతో వంతెన రక్షణగా ఉన్న సిమెంటు దిమ్మెలు దెబ్బతిన్నాయి. వంతెన పొడవునా కంకర లేచి లోతైన గుంతలు పడటంతో వాహనాలు రాకపోకలకు ఇబ్బందులు ఎదురవుతున్నాయి.