పెరిగిన దిగుబడులు దిగుతున్న టమాట ధరలు

మార్కెట్‌కు 1,217 మెట్రిక్‌ టన్నుల రాక

మార్కెట్‌ యార్డులో రోడ్డుపై బాక్సులను పెట్టి టమాటాలను గ్రేడింగ్‌ చేస్తున్న కార్మికులు

మదనపల్లె పట్టణం, న్యూస్‌టుడే : మార్కెట్‌ యార్డుకు గత సోమవారం నుంచి క్రమంగా టమాట దిగుబడులు పెరుగుతున్నాయి. ఆదివారం అత్యధికంగా 1,217 మెట్రిక్‌ టన్నుల టమాటాలను రైతులు మార్కెట్‌కు తీసుకొచ్చారు. దిగుబడి పెరగడంతో మండీల్లో స్థలం చాలక రోడ్డుపైనే బాక్సులను ఉంచి గ్రేడింగ్‌ చేయాల్సి వచ్చింది. టమాట రవాణా చేయడానికి వందల సంఖ్యలో లారీలు మార్కెట్‌లోకి రావడంతో ట్రాఫిక్‌ సమస్య ఏర్పడింది. మార్కెట్‌ కార్యదర్శి అభిలాష్‌ వాహనాలను నియంత్రించారు. యార్డు ఎదుట జాతీయ రహదారిపై వాహనాలు బారులు తీరాయి.
కిలో రూ.48కి టమాట : దిగుబడి పెరగడంతో టమాట ధర తగ్గుముఖం పట్టింది. మొదటి రకం 10 రోజులు క్రితం రూ.80 పలికింది. ప్రస్తుతం రూ.48కి తగ్గింది. వారం రోజుల నుంచి ధరలు క్రమంగా తగ్గుముఖం పట్టడంతో రైతుల్లో ఆందోళన మొదలైంది.