అటవీ అధికారులను అడ్డుకున్న ఆక్రమణదారులు

ఎఫ్‌బీవో రాజేష్‌తో వాగ్వాదానికి దిగిన పెన్నానగర్‌ వాసులు

ప్రొద్దుటూరు, న్యూస్‌టుడే: ప్రొద్దుటూరు మండలం సోములవారిపల్లె పంచాయతీ అటవీ ప్రాంత భూముల ఆక్రమణదారులందరికీ శుక్రవారం తాఖీదులు ఇచ్చేందుకు వెళ్లిన అటవీశాఖ అధికారులను అడ్డుకున్నారు. గుడిసెలు వేసే సమయంలో అడ్డుకోకుండా 30 ఏళ్ల తర్వాత వచ్చి ఖాళీ చేయాలంటే, తాము ఎక్కడికి వెళ్లి బతకాలని వారంతా అధికారులను నిలదీశారు. తమ విధులను అడ్డుకోవద్దని ఇది లోకాయుక్త కోర్టు ఆదేశాలని అందరూ సహకరించాలని అధికారులు వారికి నచ్చజెప్పే ప్రయత్నం జేశారు. వాగ్వాదానికి దిగిన వారంతా పోలీసుల జోక్యంతో సద్దుమణిగారు. ఈ విషయమై ఎఫ్‌ఆర్వో హేమాంజలి మాట్లాడుతూ రామేశ్వరం రిజర్వు అటవీ ప్రాంతం భూములన్నీ అన్యాక్రాంతమయ్యాయని, వాటిని సంరక్షించాలని  లోకాయుక్త కోర్టు ఆదేశించింది. తమ పరిశీలనలో సర్వే సంఖ్య 542/1లో 16.23 ఎకరాల భూములను 219 మంది ఆక్రమించి ఇళ్లు, పరిశ్రమల వంటి కట్టడాలు నిర్మించినట్లు గుర్తించాం. వారికి తాఖీదులిచ్చి నిర్ణీత గడువులోపు ఖాళీ చేయించి అటవీ భూములను స్వాధీనం చేసుకునేలా 172 మందికి తాఖీదులిచ్చామని, 15 రోజుల్లో ఖాళీ చేయకుంటే తదుపరి చర్యలు తీసుకుంటామని వివరించారు.