ఇసుక దొంగలొస్తున్నారు జాగ్రత్త!

మంత్రులు, ఎమ్మెల్యేల పేర్లు చెప్పి దందా 
వింజరంలో అడ్డుకున్న గ్రామస్థులు 

వింజరంలో నిల్వ ఉంచిన ఇసుక

కుక్కునూరు, న్యూస్‌టుడే: భారీ పొక్లెయిన్, టిప్పర్లతో శనివారం సాయంత్రం కొందరు వ్యక్తులు కుక్కునూరు మండలం వింజరం నిల్వ కేంద్రం వద్దకు చేరుకుని టిప్పర్లలో ఇసుక నింపుతున్నారు. గ్రామస్థులు అడ్డుకొని ప్రశ్నించగా జిల్లాకు సరిహద్దుగా ఉన్న తూర్పుగోదావరి జిల్లాలోని ఓ ఎమ్మెల్యే పంపితే వచ్చామని సదరు వ్యక్తులు చెప్పారు. అనుమానం వచ్చిన గ్రామస్థులు వారికి తెలిసిన వారి ద్వారా ఆ ప్రజాప్రతినిధిని సంప్రదించే ప్రయత్నం చేశారు. సదరు వ్యక్తులు శాసనసభ్యుడు కాదంటూ అదే జిల్లాకు చెందిన ఓ మంత్రి పేరు చెప్పారు. ఈ నేపథ్యంలో వచ్చిన వారు అక్రమార్కులుగా భావించి ఇసుక తరలించేందుకు తెచ్చిన వాహనాలను అడ్డుకున్నారు. అధికారుల దృష్టికి తీసుకెళ్లినా.. వారు తమకు తెలియదన్నారు. చివరకు నియోజకవర్గ నాయకులు జోక్యం చేసుకుని ఆదివారం ఉదయం ఆ వాహనాలను విడిపించడంతో వాటిని తీసుకుని వెళ్లిపోయారు.

నిల్వలపై కన్ను 

వైకాపా ప్రభుత్వ హయాంలో వర్షాకాలంలో తలెత్తే ఇబ్బందులను దృష్టిలో పెట్టుకుని కుక్కునూరు మండలం ఇబ్రహీంపేట, వింజరం ఇసుక రేవుల వద్ద లక్షల టన్నుల ఇసుక నిల్వ చేశారు. అప్పట్లో ఆ ఇసుకను తరలించకూడదన్న సుప్రీంకోర్టు ఆదేశాలున్నాయి. ఇంతలోనే ఎన్నికలు రావడం, అధికార మార్పిడి జరగడంతో ఇప్పుడు ఆ నిల్వలపై ఇసుక వ్యాపారంలో ఆరితేరిన బడాబాబుల కళ్లు పడ్డాయి. ప్రముఖులతో చెప్పించుకుని తరలించేందుకు ఏర్పాట్లు చేసుకుంటున్నారు. తాజా ఘటన కూడా ఆ తరహాలో జరిగిందే. గ్రామస్థులు ఎంత చెప్పినా వారు ఏ మాత్రం తడబడకుండా ఇసుకను తరలించుకుపోయే యత్నాలు చేయడం గమనార్హం. మీరు ఎంత మంది అడ్డు చెప్పినా.. అధికారులు వచ్చి దగ్గరుండి వాహనాలు పంపిస్తారంటూ బీరాలు పలికారు. అయితే గ్రామస్థులు ఆ బెదిరింపులకు లొంగకపోవడం, వాహనాలను కదలనీయకపోవడంతో చివరకు చేసేది లేక వదిలేయమని కోరారు. దానికి కూడా గ్రామస్థులు అంగీకరించలేదు. చివరకు నియోజకవర్గంలోని ఓ ప్రముఖ వ్యక్తితో ఫోన్‌ చేయించుకుని వాహనాలను తీసుకెళ్లాల్సి వచ్చింది. 

జిల్లాలో ఎక్కడా అందుబాటులో లేక.. 

ఈ స్థాయిలో జిల్లాలో ఎక్కడా ఇసుక అందుబాటులో లేదు. తూర్పుగోదావరి జిల్లాలో రేవులు ఉన్నా అక్కడ డ్రెడ్జింగ్‌ (నీళ్లలోంచి ఇసుక తీయడం) ద్వారానే లభిస్తోంది. ఈ నేపథ్యంలో అంత కష్టపడకుండా సులభంగా తరలించుకునే వీలున్న ఇక్కడి నిల్వలపై ఇసుకాసురుల కళ్లు పడ్డాయి. రాజకీయ నాయకుల సహకారం ఎంత ఉందో తెలియదు గానీ, వచ్చిన వ్యక్తులు మంత్రి, ఎమ్మెల్యేల పేర్లు చెప్పడం గమనార్హం.