ఇన్నాళ్ల్లూ కళ్లు మూసుకున్నారా?

వైకాపా అక్రమ  నిర్మాణంపై ఎమ్మెల్యే ఆగ్రహం

కమిషనర్‌ వెంకటకృష్ణను ప్రశ్నిస్తున్న చంటి 
ఏలూరు టూటౌన్, న్యూస్‌టుడే: అనుమతులు లేకుండా వైకాపా జిల్లా కార్యాలయ భవనం అక్రమంగా నిర్మిస్తుంటే ఇన్నాళ్లూ కళ్లు మూసుకున్నారా అని ఎమ్మెల్యే బడేటి చంటి నగరపాలక సంస్థ అధికారులపై ఆగ్రహం వ్యక్తం చేశారు. ఏలూరులోని వైకాపా జిల్లా కార్యాలయాన్ని బుధవారం పరిశీలించిన అనంతరం ఆయన మాట్లాడుతూ... వైకాపా దుర్మార్గ పాలనా విధానాలు ఒక్కొక్కటిగా వెలుగులోకి వస్తున్నాయని.. వాటన్నింటినీ కూకటివేళ్లతో పెకిలిస్తామన్నారు. నగరంలో ఇతరులకు కేటాయించిన స్థలాన్ని వైకాపా నాయకులు అక్రమంగా బదలాయించుకుని... ఆ స్థలంలో నిబంధనలు పాటించకుండా కార్యాలయం నిర్మించారన్నారు. 30 ఏళ్లకు పైగా కార్యాలయ స్థలాన్ని అద్దెకు తీసుకున్నట్లు దస్త్రాలు సృష్టించారన్నారు. గతంలో స్థలానికి సంబంధించి ఎలాంటి చెల్లింపులు చేయలేదని... ఇప్పుడు హడావుడిగా రూ.12 లక్షలు ఇచ్చి అధికారికంగా చేయాలని చూస్తున్నారన్నారు. దీన్ని ఏమాత్రం సహించబోమని చంటి స్పష్టం చేశారు. ఆయన వెంట కమిషనర్‌ సంక్రాంతి వెంకటకృష్ణ, పలువురు తెదేపా నాయకులు ఉన్నారు.