జై భద్రకాళి.. జై తుల్జా భవానీ..

వరంగల్‌ ఎంపీ కడియం కావ్య

ఉమ్మడి వరంగల్‌కు చెందిన ఇద్దరు ఎంపీలు మంగళవారం పార్లమెంటులో ప్రమాణస్వీకారం చేశారు. వరంగల్‌ ఎంపీ కడియం కావ్య తన ప్రమాణ స్వీకారం ప్రక్రియ పూర్తయ్యాక ‘జై భద్రకాళి’ అంటూ ఓరుగల్లు అమ్మవారిని స్మరించుకున్నారు. ఆ తర్వాత ‘జై భీమ్‌’ అని నినదించారు. అంతకు ముందు ఆమె తన తండ్రి, స్టేషన్‌ఘన్‌పూర్‌ ఎమ్మెల్యే కడియం శ్రీహరితో కలిసి కాంగ్రెస్‌ పార్టీ అధ్యక్షుడు మల్లికార్జున ఖర్గేను మర్యాదపూర్వకంగా కలిసి పుష్పగుచ్ఛం అందించారు. అనంతరం ఏఐసీసీ ఎస్సీ, ఎస్టీ, బీసీ, మైనారిటీ జాతీయ సమన్వయకర్త కొప్పుల రాజును కలిశారు.

మహబూబాబాద్‌ ఎంపీ పోరిక బలరాంనాయక్‌

మహబూబాబాద్‌ ఎంపీ పోరిక బలరాంనాయక్‌ పార్లమెంటు సభ్యుడిగా రెండోసారి ప్రమాణస్వీకారం చేశారు. ప్రమాణం పూర్తయ్యాక గిరిజనుల ఆరాధ్యదైవం జై తుల్జా భవానీ, జై తెలంగాణ అంటూ నినదించారు. ఆయన్ను డోర్నకల్‌ ఎమ్మెల్యే, రాష్ట్ర ప్రభుత్వ విప్‌ జాటోత్‌ రామచంద్రునాయక్‌తో పాటు  పలువురు నాయకులు అభినందించారు.

ఈనాడు, వరంగల్, మహబూబాబాద్, న్యూస్‌టుడే, మహబూబాబాద్‌