Vizianagaram: వ్యాధులు ప్రబలకుండా చర్యలు చేపట్టాలి

విజయనగరం గ్రామీణం: ప్రస్తుత వర్షాకాలంలో వ్యాధులు ప్రబలే అవకాశం ఉన్నందున సంబంధిత ప్రభుత్వ శాఖలు నిరంతరం అప్రమత్తంగా వుంటూ జిల్లాలో ముందు జాగ్రత్త చర్యలు చేపట్టాలని మంత్రి కొండపల్లి శ్రీనివాస్ జిల్లా అధికారులను ఆదేశించారు. కాలానుగుణ వ్యాధుల నియంత్రణపై బుధవారం మంత్రి కలెక్టర్ కార్యాలయంలో జిల్లా కలెక్టర్ డా.బి.ఆర్.అంబేడ్కర్‌తో కలసి సమీక్ష సమావేశం నిర్వహించారు. గ్రామీణ పట్టణ ప్రాంతాల్లో వర్షాకాలంలో జనావాసాల మధ్య నీటి నిల్వలు లేకుండా చూడటం, తాగునీటి వనరులు కలుషితం కాకుండా చర్యలు చేపట్టడం, నీటి వనరులు క్రమం తప్పకుండా క్లోరినేషన్ చేయడం, పారిశుద్ధ్య నిర్వహణ వంటి చర్యలపై దృష్టి సారించి వ్యాధుల నియంత్రణకు సంబంధిత అన్ని శాఖలు సమన్వయంతో కార్యాచరణ చేపట్టాలన్నారు.  
సమావేశంలో ఆర్.డి.ఓ.లు బి.శాంతి, ఎం.వి.సూర్యకళ, ఇన్‌ఛార్జి ఆర్.డి.ఓ.మురళీకృష్ణ, జి.జి.హెచ్. సూపరింటెండెంట్‌ డా.ఎస్.అప్పల నాయుడు, డి.సి.హెచ్.ఎస్. డా.గౌరీశంకర్ తదితరులు పాల్గొన్నారు.