ఈనెల పంచదార లేనట్టే..!

తూకాల్లో అక్రమాల నేపథ్యంలో నిలిపివేత

వన్‌టౌన్, న్యూస్‌టుడే: జులై నెల కోటా కింద రేషను కార్డుదారులకు పంచదార అందే పరిస్థితి లేదు. ఇటీవల రాష్ట్ర పౌరసరఫరాల శాఖ మంత్రి నాదెండ్ల మనోహర్‌ గుంటూరు జిల్లాలోని పౌరసరఫరాల సంస్థ గోదాములను ఆకస్మికంగా తనిఖీ చేశారు. పంచదార, కందిపప్పు, ఇతర సరకులను తూకం వేసి చూడగా భారీ వ్యత్యాసం కనిపించింది. దీనిపై రాష్ట్ర వ్యాప్తంగా విచారణ చేపట్టగా అంతటా తూకాలు సరిగా లేనట్టు తేలింది. ఫలితంగా సంబంధిత గుత్తేదారుని నిలిపివేశారు. గోదాములకు సరకు రాకపోవడంతో జులై నెల వరకు పంపిణీ చేయలేకపోతున్నారు. 

జిల్లాలో 5.20లక్షల కార్డుదారులు ఉండగా, వారెవరికీ ఈనెల పంచదార అందే పరిస్థితి లేదు. వచ్చే నెలకు సంబంధించి కొత్త గుత్తేదారు వస్తే ఇస్తారు. ఈనెల మాత్రం ఉచితంగా బియ్యం పంపిణీ చేస్తున్నారు. గోధుమపిండి కిలో రూ.16 చొప్పున రెండు కిలోల వరకు ఇవ్వనున్నారు. ఈ మేరకు డిపోలకు సరకును సరఫరా చేశారు.