సింహగిరిపై వరద పాయసం ఉత్సవం రేపు

సింహాచలం, న్యూస్‌టుడే: వర్షాలు సమృద్ధిగా కురిసి పంటలు బాగా పండాలన్న సంకల్పంతో సింహగిరి వైకుంఠవాసుల మెట్టపై బుధవారం వరద పాయసం ఉత్సవం నిర్వహించనున్నట్లు ఈవో సింగల శ్రీనివాసమూర్తి తెలిపారు. వర్షాభావ పరిస్థితుల్లో వైకుంఠవాసుల మెట్టపై కొలువైన లక్ష్మీనారాయణుల సన్నిధిలో ఈ వేడుక నిర్వహించడం సంప్రదాయంగా వస్తోంది. ఆ క్రమంలో బుధవారం ఉదయం 8గంటల నుంచి ఈ ఉత్సవం నిర్వహించాలని వైదికులు నిర్ణయించినట్లు ఈవో పేర్కొన్నారు. ఈ సందర్భంగా స్వామి సన్నిధిలో విష్వక్సేన ఆరాధన, పుణ్యాహవాచనం, లక్ష్మీనారాయణులకు పంచకలశ పూర్వక అభిషేకం, విరాట పర్వం పారాయణం, వరుణ మంత్ర జపం, పాయసం నివేదన జరుగుతాయని వివరించారు.