ఆర్టీసీకి కార్మికులు, ప్రయాణికులు రెండు కళ్లు

త్వరలో మహిళలకు ఉచిత బస్సు ప్రయాణం
రవాణా మంత్రి రామ్‌ప్రసాద్‌రెడ్డి 

మద్దిలపాలెం, న్యూస్‌టుడే : ఆర్టీసీకి కార్మికులు, ప్రయాణికులు రెండు కళ్లులాంటి వారని రాష్ట్ర రవాణా, క్రీడలు, యువజన సర్వీసుల శాఖమంత్రి మండిపల్లి రామ్‌ప్రసాద్‌రెడ్డి అన్నారు. సోమవారం మద్దిలపాలెం సిటీడిపోలో ఆయన మూడు సూపర్‌ లగ్జరీ బస్సులను జెండాఊపి ప్రారంభించారు. అనంతరం ఆయన మాట్లాడుతూ.. ఆర్టీసీలో సంస్కరణలు తీసుకువచ్చి లాభాల బాటలో నడిపిస్తామన్నారు. త్వరలో మహిళకు ఉచిత బస్సు ప్రయాణం అందుబాటులోకి తీసుకువస్తామన్నారు. అందరి సహకారంతో ప్రమాదాలు సున్నాస్థాయికి తెస్తామన్నారు. భవిష్యత్తులో ఎలక్ట్రిక్‌ బస్సులు అందుబాటులోకి వస్తాయన్నారు. ఆర్టీసీ స్థలాల్లో కార్గొ, కాంప్లెక్సులు వంటివి ఏర్పాటు చేస్తామని, కార్మికులకు భద్రత కల్పిస్తామన్నారు. అనంతరం గ్యారేజీ ప్రాంగణంలో మొక్కలను నాటారు. ఉత్తమ సిబ్బందికి జ్ఞాపికలు అందజేశారు. కార్యక్రమంలో ఎమ్మెల్యే వెలగపూడి రామకృష్ణబాబు, ఆర్టీసీ రీజనల్‌ మేనేజర్‌ అప్పలరాజు, అధికారులు కణితి వెంకటరావు, అప్పలనాయుడు, డిపో మేనేజర్లు, వివిధ సంఘాల నాయకులు పాల్గొన్నారు.