పారిశుద్ధ్య కార్మికులను బస్సులో ఎక్కనివ్వని కండక్టర్‌ సహా ఇద్దరి సస్పెన్షన్‌

ఆందోళనకు దిగిన కార్మికులతో మాట్లాడుతున్న పోలీసులు

ఆర్కేనగర్, న్యూస్‌టుడే: తంజావూర్‌ ప్రభుత్వ ఆస్పత్రి పారిశుద్ధ్య కార్మికులు, నర్సులను బస్సులోకి ఎక్కించేందుకు నిరాకరించిన కండక్టర్‌ సహా ఇద్దరిని సస్పెండ్‌ చేశారు. నర్సులు, పారిశుద్ధ్య కార్మికులు పెద్దసంఖ్యలో మంగళవారం ఉదయం పాతబస్టాండ్‌కు వచ్చారు. అక్కడి నుంచి ఆస్పత్రికి వెళ్లేందుకు ప్రభుత్వ బస్సు ఎక్కారు. బస్సు ఆలస్యంగా బయల్దేరుతుందని అందరూ దిగి వెళ్లిపోవాలని కండక్టర్‌ యేసుదాస్‌ చెప్పాడు. నర్సులు, పారిశుద్ధ్య కార్మికులు బస్టాండ్‌ వద్ద ఆందోళనకు దిగారు. సమయానికి విధులకు వెళ్లలేకపోతున్నామని ఆరోపించారు. సమాచారం మేరకు అక్కడికొచ్చిన పోలీసులు అంబులెన్స్‌లో అందరినీ ఆస్పత్రికి పంపారు. ఈ వ్యవహారంపై రవాణశాఖ అధికారులు విచారణ జరిపారు. టైమ్‌ కీపర్‌ రాజా, కండక్టర్‌ యేసుదాస్‌ను సస్పెండ్‌ చేస్తూ శాఖాపరంగా చర్యలు తీసుకున్నారు.