ఎస్సైగా చెప్పుకొంటూ చోరీలకు పాల్పడుతున్న యువతి

 గంగాదేవి

ప్యారిస్, న్యూస్‌టుడే: తూత్తుక్కుడి జిల్లా రాజపాళెయానికి చెందిన గంగాదేవి ప్లస్‌టూ వరకు చదివింది. ఈమె తాను సబ్‌ ఇన్‌స్పెక్టర్‌గా పనిచేస్తున్నట్లు ఐడీకార్డు సృష్టించింది. ఈ నేపథ్యంలో కొన్ని రోజుల క్రితం కామరాజర్‌ నగర్‌లో ఉన్న తన స్నేహితురాలి ఇంటికి వెళ్లింది. అక్కడ స్నేహితురాలి తల్లితో.. తాను చెన్నైలో ఎస్సైనని, ఎన్‌కౌంటర్‌ విషయమై తూత్తుక్కుడికి వచ్చానని, రెండు రోజులు వారి ఇంట్లో ఉండేందుకు అనుమతి ఇవ్వాలని కోరింది. దీంతో ఇంట్లో ఉండేందుకు ఆమె అనుమతి ఇచ్చింది. ఈ క్రమంలో గంగాదేవి ఇంట్లో ఉన్న బంగారు నగలు, నగదు చోరీచేసి పారిపోయింది. బాధితురాలి ఫిర్యాదు మేరకు పోలీసులు దర్యాప్తు చేపట్టి శుక్రవారం మరో స్నేహితురాలి ఇంట్లో ఈ విధంగానే నగదు చోరీ చేసినట్లు గుర్తించారు. సోమవారం గంగాదేవిని అరెస్టు చేశారు.