మహిళలకు ప్రత్యేక తిరునాల

వధూవరుల వేషధారణలో బాలికలు

వేలూర్, న్యూస్‌టుడే: వేలూర్‌ జిల్లా ఓడుగత్తూర్‌ సమీపం తొంగుమలై గ్రామంలో 3 వేల మందికి పైగా గిరిజనులు నివసిస్తున్నారు. ఇక్కడ వందేళ్లకు పైగా జరుగుతున్న కాళియమ్మన్‌ ఆలయ ఉత్సవం 48 రోజుల క్రితం ప్రారంభమైంది. సాంప్రదాయం ప్రకారం గిరిజన మహిళలు వ్రతం ఆచరించి అమ్మవారిని పూజిస్తారు. ఈ నేపథ్యంలో శనివారం మహిళలు మాత్రమే పాల్గొనే తిరునాల జరిగింది. ఈ సందర్భంగా మహిళలంతా ఒకచోట చేరి సాంప్రదాయ నృత్యం చేశారు. అనంతరం ఇద్దరు బాలికలకు వివాహ దుస్తులు ధరింపజేసి, వారికి వివాహం చేసినట్లుగా కార్యక్రమం నిర్వహించారు. వారిని దైవంగా భావించి పూజించారు. ఈ తిరునాలలో పురుషులు పాల్గొనకూడదని, అలా చేస్తే వారిని తరిమికొడతారని గ్రామస్థులు తెలిపారు.

ఉత్సవంలో పాల్గొన్న మహిళలు