తెదేపా ఖాతాలోకి గిద్దలూరు నగర పంచాయతీ!

ఎమ్మెల్యే అశోక్‌రెడ్డి సమక్షంలో తెదేపాలో చేరిన ఛైర్మన్‌ వెంకటసుబ్బయ్య, కౌన్సిలర్లు

గిద్దలూరు పట్టణం, న్యూస్‌టుడే: గిద్దలూరు నగర పంచాయతీ ఛైర్మన్‌ పాముల వెంకట సుబ్బయ్య, మరో అయిదుగురు కౌన్సిలర్లు... ఎమ్మెల్యే ముత్తుముల అశోక్‌రెడ్డి సమక్షంలో ఆదివారం తెదేపాలో చేరారు. దీంతో పాలకవర్గం తెదేపా ఖాతాలోకి చేరింది. పట్టణంలో మొత్తం ఇరవై వార్డులు ఉన్నాయి. 2021 మార్చిలో జరిగిన పురపాలక ఎన్నికల్లో తెదేపా 3, వైకాపా 17 వార్డులు గెలుచుకున్నాయి. ఇటీవలి సార్వత్రిక ఎన్నికల సమయంలో వైకాపా కౌన్సిలర్లు గడ్డం భాస్కర్‌రెడ్డి, లొక్కు రమేష్‌ తెదేపా తీర్థం పుచ్చుకున్నారు. తాజాగా ఛైర్మన్‌తో పాటు సభ్యులు పరుచూరి సుభాషిణి, గర్రె సునీత, దేమా చాముండేశ్వరి, పఠాన్‌ ఖాదర్‌ఖాన్‌ (పెద్దవలి), షేక్‌ హసీనా తెదేపాలో చేరారు. దీంతో తెలుగుదేశం కౌన్సిలర్ల సంఖ్య 11 చేరి... నగర పంచాయతీ పాలకవర్గం తెదేపా వశమైంది.