రెండొందల బస్తాల బియ్యం పట్టివేత

వైకాపా నాయకుడిపై కేసు

బియ్యం బస్తాలు పరిశీలిస్తున్న ఎస్సై సైదుబాబు 

పామూరు, న్యూస్‌టుడే: పామూరులోని ఆర్టీసీ బస్‌స్టేషన్‌కు సమీపంలోని ప్రైవేటు గోదాము సముదాయంలో అక్రమంగా నిల్వ ఉంచిన రేషన్‌ బియ్యాన్ని పోలీసులు, రెవెన్యూ సిబ్బంది శనివారం రాత్రి స్వాధీనం చేసుకున్నారు. అక్రమంగా రేషన్‌ బియ్యం నిల్వ ఉంచినట్లు పోలీసులకు వచ్చిన పక్కా సమాచారం మేరకు సీఐ రామానాయక్, ఎస్సై ఎం.సైదుబాబు, వీఆర్వోలు షేక్‌ ఖాజారఫీ, రఫీఅహ్మద్‌ శనివారం రాత్రి సమయంలో గోదాము తాళాలు తీయించి తనిఖీలు చేపట్టారు. గోదాములో 200 బస్తాలు (100 క్వింటాళ్లు) రేషన్‌ బియ్యం ఉండడంతో వాటిని స్వాధీనం చేసుకున్నారు. వైకాపా నాయకుడు, సింగిల్‌విండో డైరెక్టర్‌ చెనికల శ్రీనివాసులు రేషన్‌ బియ్యం కొనుగోలు చేసి అక్రమ వ్యాపారం చేస్తున్నారు. స్వాధీనం చేసుకున్న రేషన్‌ బియ్యానికి బాధ్యుడైన చెనికల  శ్రీనివాసులుపై కేసు నమోదు చేసినట్లు ఎస్సై ఎం.సైదుబాబు స్పష్టం చేశారు. ఈ బియ్యాన్ని ఫౌరసరఫరాల శాఖ గోదాము సిబ్బందికి స్వాధీనం చేసినట్లు తెలిపారు.