ఆస్తి రాయించుకుని..అమ్మను రోడ్డు పాల్జేసి..

మార్కాపురం నేర విభాగం న్యూస్‌టుడే: నవ మాసాలు మోసి..కన్న ఆ మాతృమూర్తి పట్ల కుమారుడు అమానుషంగా ప్రవర్తించాడు. ఆస్తిని తన పేర రాయించుకొని ఆమెను రోడ్డున పడేశాడు. ఈ మేరకు బాధితురాలి ఫిర్యాదుతో కుమారుడు, కోడలిపై పోలీసులు సోమవారం కేసు నమోదు చేశారు. వారి కథనం ప్రకారం...స్థానిక విద్యుత్తు కార్యాలయం వెనుక నివాసం ఉండే వెన్నా సావిత్రమ్మ(80)కు ఇద్దరు కుమారులున్నారు. 2000లో భర్త మృతి చెందారు. ఆ తదనంతరం చిన్న కుమారుడైన వెన్నా శ్రీనివాసరెడ్డి ఆమె పేర ఉన్న ఇంటిని రాయించుకున్నాడు. అయితే గత కొంతకాలం నుంచి కుమారుడు శ్రీనివాసరెడ్డి, కోడలు భూలక్ష్మి కలిసి సావిత్రమ్మను నిత్యం వేధిస్తున్నారు. ఆమెను బెదిరించి ఇంటి నుంచి వెళ్లగొట్టేశారు. దీంతో దిక్కుతోచని ఆ వృద్ధ మాతృమూర్తి సోమవారం పోలీసులకు ఫిర్యాదు చేసింది. ఈ మేరకు కేసు నమోదు చేసి దర్యాప్తు చేస్తున్నట్లు పట్టణ ఎస్సై అబ్దుల్‌ రెహమాన్‌ చెప్పారు.