ప్రసూతి మరణాలు సంభవిస్తే చర్యలు

అధికారులకు సూచనలు చేస్తున్న కలెక్టర్‌ అంబేడ్కర్‌

విజయనగరం ఉడాకాలనీ, న్యూస్‌టుడే: జిల్లాలో ఒక్క ప్రసూతి మరణం సంభవించినా సంబంధిత అధికారులు, సిబ్బందిపై కఠిన చర్యలు తీసుకుంటామని కలెక్టర్‌ బి.ఆర్‌.అంబేడ్కర్‌ హెచ్చరించారు. గురువారం కలెక్టరేట్‌లో జరిగిన సమావేశంలో ఆయన మాట్లాడారు. ఫిబ్రవరి నుంచి ఏప్రిల్‌ వరకు ఏడు మాతృ, శిశు మరణాలు జరిగాయని చెప్పారు. ఈ మేరకు సంబంధిత కారణాలపై సమీక్షించారు. ముందుగానే లోపాలను గుర్తించాలని చెప్పారు. క్షేత్రస్థాయిలో ఆశా వర్కర్లు, ఏఎన్‌ఎంలు, అంగన్‌వాడీ కార్యకర్తలు ఉన్నారని, వారి సేవలను పక్కాగా ఉపయోగించుకోవాలని ఆదేశించారు. మరింత బాధ్యతాయుతంగా పనిచేయాలని కోరారు. నిర్లక్ష్యం వహిస్తే క్రిమినల్‌ చర్యలు తీసుకోవడానికి కూడా వెనుకాడబోమని స్పష్టం చేశారు. డీఎంహెచ్‌వో ఎస్‌.భాస్కరరావు, డీసీహెచ్‌ఎస్‌ గౌరీశంకర్, డీఐవో అచ్యుతకుమారి తదితరులు పాల్గొన్నారు.