కొండలపై రోడ్ల నిర్మాణానికి పెద్దపీట

పారతో మట్టి తీస్తున్న ఎమ్మెల్యే జగదీశ్వరి

గుమ్మలక్ష్మీపురం, న్యూస్‌టుడే: గిరిజన ప్రాంతాల్లోని మారుమూల కొండలపైనున్న గ్రామాలకు రహదారుల సౌకర్యం కల్పించేందుకు చర్యలు తీసుకుంటున్నామని ఎమ్మెల్యే జగదీశ్వరి తెలిపారు. గుమ్మలక్ష్మీపురం మండలంలోని ఎగువతాడికొండ నుంచి చాపరాయిజంగిడిభద్ర వరకు రూ.2.60 కోట్లతో 3.5 కిలోమీటర్ల మేర బీటీ రోడ్డు నిర్మాణానికి గురువారం భూమి పూజ చేశారు. గిరిశిఖరాలపై రోడ్ల ఏర్పాటుకు పెద్దపీట వేస్తున్నామన్నారు. గ్రామానికి తొలిసారి ఎమ్మెల్యే వెళ్లడంతో గిరిజనులు డప్పులతో సందడి చేస్తూ స్వాగతం పలికారు. ఈ కార్యక్రమంలో తెదేపా మండల కన్వీనర్‌ పి.సుదర్శనరావు, ఈఈ శాంతేశ్వరరావు, డీఈఈ సింహాచలం, నాయకులు పద్మావతి, కళావతి, భారతమ్మ తదితరులు పాల్గొన్నారు.