ఇక రైతు సేవా కేంద్రాలు

    సీహెచ్‌ బొడ్డవలసలో రైతు భరోసా కేంద్రం 

బొబ్బిలి గ్రామీణం, న్యూస్‌టుడే: రైతు భరోసా కేంద్రాలను ఇక నుంచి రైతు సేవా కేంద్రాలుగా మారుస్తూ ప్రభుత్వం నిర్ణయం తీసుకుంది. వ్యవసాయశాఖకు ఆదేశాలు అందాయి. వైకాపా ప్రభుత్వం సచివాలయ వ్యవస్థను ఏర్పాటుచేసి ఆ పరిధిలో ఆర్బీకేలను ఏర్పాటుచేసింది. రైతులకు విత్తనాలు, ఎరువులు వీటి ద్వారానే అందిస్తున్నారు. పంటల సాగుపై రైతులకు శిక్షణ ఇచ్చేందుకు శాస్త్రవేత్తలతో సమావేశాలు నిర్వహించాలని, బ్యాంకుల ద్వారా రుణాలు ఇచ్చే ఏర్పాటు చేస్తామని చెప్పినా అమలు కాలేదు. ఒక్కో కేంద్రం నిర్మాణానికి రూ.23 లక్షల చొప్పున ఉపాధి నిధులు వెచ్చించారు. వ్యవసాయ, ఉద్యాన సహాయకులను ప్రభుత్వం నియమించింది. వారే రైతులకు అందుబాటులో ఉండి సేవలు అందిస్తున్నారు. జిల్లాలో 510 ఆర్బీకేలున్నాయి. కొన్నిచోట్ల భవనాలు మంజూరైనా బిల్లులు చెల్లించకపోవడంతో సగంలో పనులు నిలిచిపోయాయి. రైతులకు సమాచారం అందించే రైతు భరోసా మేగజైన్‌ను ‘పాడిపంటలు’గా పేరు మార్చారు. ఆర్బీకే ఛానల్‌కు పాడిపంటలు ఛానల్‌గా మార్చారు. రైతు సేవా కేంద్రాలుగా మార్చుతూ ఆదేశాలొచ్చాయని బొబ్బిలి ఏడీఏ మజ్జి శ్యామ్‌సుందర్‌ తెలిపారు.