రైల్వే గేట్లు తొలగించాలని వినతి

ఓఎస్‌డీకి వినతిపత్రం ఇస్తున్న ఎంపీ కలిశెట్టి అప్పలనాయుడు  

కొమరాడ, న్యూస్‌టుడే: కొమరాడ మండలంలోని అర్తాం నుంచి కోటిపాం వరకు 5 కిలోమీటర్ల దూరంలో ఉన్న మూడు రైల్వేగేట్ల సమస్యను పరిష్కరించాలని విజయనగరం ఎంపీ కలిశెట్టి అప్పలనాయుడు శుక్రవారం దిల్లీలో ఆ శాఖ ఓఎస్డీ వేదప్రకాశ్‌ను కలిసి వినతిపత్రం అందించారు. విశాఖ నుంచి పార్వతీపురం మీదుగా ఒడిశా, మధ్యప్రదేశ్, ఛత్తీస్‌గఢ్‌కు వెళ్లే భారీ వాహనాలు, చోదకులు గేట్ల వద్ద ఆగిపోవడంతో ఇబ్బందులు ఎదుర్కొంటున్నారన్నారు. అంబులెన్స్‌లు ఆగిపోవడంతో ఒక్కోసారి రోగుల ప్రాణాలు పోతున్నాయని వివరించారు. ఒక గేటు వద్ద పైవంతెన నిర్మించి, మిగిలిన రెండు గేట్లు తొలగించాలని కోరారు.