ఆ ఫోన్‌కాల్స్‌పై అప్రమత్తత అవసరం

 పోలీసు శాఖ విడుదల చేసిన ప్రకటన 

విజయనగరం నేరవార్తా విభాగం, న్యూస్‌టుడే: కొన్ని కొరియర్‌ సర్వీసుల పేర్లతో వచ్చే ఫోన్‌ కాల్స్‌ విషయంలో ప్రజలు అప్రమత్తంగా ఉండాలని ఎస్పీ దీపిక ఎం.పాటిల్‌ కోరారు. తెలియని, అనవసర లింకులను తెరవొద్దని, నకిలీ యాప్‌లను డౌన్‌లోడ్‌ చేయొద్దని విన్నవించారు. చాలామంది మోసాలకు గురవుతున్నారని పేర్కొన్నారు. ఈ మేరకు తగిన జాగ్రత్తలు తీసుకోవాలని కోరుతూ గురువారం ఓ ప్రకటన విడుదల చేశారు. వివిధ సంస్థలు, ప్రఖ్యాతి గాంచిన వ్యక్తులు, ప్రభుత్వ విభాగాల పేరుతో చరణాలకు సంక్షిప్త సమాచారాలు పంపిస్తున్నారని చెప్పారు. చిరునామా, ఆధార్‌ సంఖ్య, బ్యాంకు ఖాతాల వివరాలను ఎట్టి పరిస్థితుల్లోనూ చెప్పొద్దన్నారు. ఓటీపీలు, పాస్‌వర్డ్‌ల విషయంలో గోప్యత పాటించాలని, ఎవరైనా నగదు పోగొట్టుకున్నా.. గుర్తుతెలియని వారు మోసం చేస్తున్నారని భావించినా వెంటనే సమీపంలోని పోలీస్‌స్టేషన్‌ను గానీ, సైబర్‌ క్రైం స్టేషన్‌ను గానీ సంప్రదించాలని, అత్యవసరమైతే 1930కు, నేషనల్‌ సైబర్‌ క్రైం పోర్టల్‌లో ఫిర్యాదు చేయాలని సూచించారు.