Odisha: ఆంత్రాక్స్‌తో ఆరుగురికి అస్వస్థత

సిమిలిగుడ: కోరాపుట్ జిల్లాలో ఈ ఏడాది ఆంత్రాక్స్ జోరుగా వ్యాపిస్తుంది. కొద్ది రోజుల క్రితం లక్ష్మిపూర్, దశ మంత్‌పూర్ సమితిలలో ఆంత్రాక్స్ తీవ్ర రూపం దాల్చగా తాజాగా కొరాపుట్ సమితిలో బయటపడింది. సమితి పరిధిలో దేవ్ ఘటి పంచాయతీకి చెందిన పొడయి గుడ గ్రామంలో ఆంత్రాక్స్ వ్యాపించింది. దీని వల్ల ఆరుగురు తీవ్ర అనారోగ్యానికి గురయ్యారు. నిల్వ ఉంచిన మాంసాన్ని గిరిజనులు తినడం వల్ల శుక్రవారం ఆరుగురికి శరీరంపై పుండ్లు ఏర్పడ్డాయి. వెంటనే వారిని మతాల్ పుట్ ఆరోగ్య కేంద్రానికి తీసువెళ్ళారు. పరీక్షలు చేసిన వైద్యులు ఆంత్రాక్స్ లక్షణాలు ఉన్నట్టు తెలిపారు. వారి రక్తంను సేకరించి, భువనేశ్వర్‌కు పరీక్ష కోసం పంపారు. ఇద్దరికి ఆంత్రాక్స్ వ్యాధి వ్యాపించినట్లు నివేదిక రావడంతో శనివారం ప్రత్యేక వైద్య బృందం గ్రామానికి వెళ్లి ఇంటింటా వైద్యం అందించడం ప్రారంభించారు.