మరింత అందుబాటులోకి ఆధునిక వైద్య సేవలు

రాష్ట్రవ్యాప్తంగా అన్ని సీహెచ్‌సీ, పీహెచ్‌సీల్లో సీటీస్కాన్‌ సేవలు
పీపీపీ విధానం ద్వారా అమలుకు సర్కార్‌ నిర్ణయం

రోగికి సీటీ స్కాన్‌ పరీక్షలు

రాయగడ పట్టణం, న్యూస్‌టుడే: రాష్ట్రంలో సామాన్యవర్గ ప్రజలకు ఆధునిక వైద్యసేవలు మరింత అందుబాటులోకి రానున్నాయి. రాష్ట్రవ్యాప్తంగా అన్ని జిల్లాల్లో సామాజిక, ప్రాథమిక ఆరోగ్య కేంద్రాలకు సిటీస్కాన్, డయాలిసిస్, ఎంఆర్‌ఐ వంటి సేవలను అందించనున్నారు. ప్రభుత్వ, ప్రైవేటు భాగస్వామ్యంతో ఈ విధానం అమలుకు సర్కార్‌ నిర్ణయించింది. దీంతో గ్రామీణ ప్రాంతాల ప్రజలకు ఆధునిక వైద్యసేవలు మరింత చేరువకానున్నట్లు సర్కార్‌ భావిస్తోంది. ఇందుకు సంబంధించి రాష్ట్ర ప్రభుత్వం అధికారికంగా మీడియా ప్రకటన విడుదల చేసింది. ఆ వివరాల ప్రకారం... సీహెచ్‌సీ, పీహెచ్‌సీల్లో ఈ సేవలు అందించే ప్రోవైడర్లు ఎప్పటికప్పుడు పర్యవేక్షించనున్నట్లు సమాచారం. ఒప్పందం ప్రకారం నియమితులైన వైద్యులు, నిపుణుల అర్హత, ఇతర అంశాలతోపాటు ఈ సేవలందించేందుకు సంబంధిత వ్యక్తులు పూర్తి అర్హులా కాదా అన్న అంశాలను క్షుణ్ణంగా పరిశీలిస్తారు.

వారంలోగా పంపించాలి

ఈ సేవలు సమకూర్చేందుకు నియమితులైనవారి పరిచయ, అర్హత పత్రాలను నిశితంగా పరిశీలించి వారం రోజుల్లోగా ఆరోగ్యశాఖకు పంపించాల్సిందిగా ప్రభుత్వం సూచించింది. ఆ దిశగా అన్ని జిల్లాల ముఖ్య వైద్యం, ప్రజారోగ్య శాఖ అధికారులు, రాష్ట్ర సంచాలకులు చర్యలు తీసుకోవాల్సిందిగా సూచించినట్లు ఆ ప్రకటనలో వెల్లడించింది. వీటిని పరిశీలించే సమయంలో సంబంధిత వైద్యులు, నిపుణులు ప్రత్యక్షంగా సీడీఎంపీహెచ్‌వోల ముందు హాజరు కావాలని అందులో స్పష్టం చేసింది. రాష్ట్రంలో చాలా జిల్లా కేంద్రాసుపత్రుల్లో సీటీస్కాన్‌ సేవలు లేక రోగులు నానా అవస్థలు పడుతున్న నేపథ్యంలో ఈ నిర్ణయం శుభపరిణామంగా భావిస్తున్నారు. ముఖ్యంగా ఆదివాసీ జిల్లాగా పేరొందిన రాయగడలో ఇవి ప్రజలకు మరింత దోహదపడనున్నాయి. తరచూ ఏదో ఒక అనారోగ్య సమస్యలతో వార్తల్లో నిలిచే కాశీపూర్, వెనుకబడిన సమితులుగా పేరొందిన చంద్రపూర్, మునిగుడకు ఈ విధానం అమలైతే ఎంతో ఉపయోగపడనున్నాయన్న వ్యాఖ్యలు అన్నిచోట్లా వినిపిస్తున్నాయి.