20 టన్నులకుపైగా గోమాంసం స్వాధీనం

ప్యాకెట్‌లలో గోమాంసం. చిత్రంలో కంటెయినర్‌ చోదకుడు

బ్రహ్మపుర నగరం, న్యూస్‌టుడే: గంజాం జిల్లా జగన్నాథపూర్‌ కూడలి సమీపాన 16వ నెంబరు జాతీయ రహదారిపై ఓ కంటెయినర్‌లో అక్రమంగా రవాణా అవుతున్న 20 టన్నులకుపైగా గోమాంసాన్ని ఛత్రపురం భజరంగదళ్‌ కార్యకర్తలు, స్థానికులు ఆదివారం పట్టుకున్నారు. ఖుర్దా నుంచి ఓ కంటెయినర్‌లో గోమాంసం ఆంధ్రవైపు అక్రమంగా రవాణా అవుతున్నట్లు సమాచారం అందడంతో గంజాం జిల్లా గంజాం, హుమ్మా, ఛత్రపురంల వద్ద శనివారం అర్ధరాత్రి నుంచి జాతీయ రహదారిపై కార్యకర్తలు కాపలా కాశారని ఛత్రపురం భజరంగదళ్‌ నాయకుడు రామకృష్ణ రెడ్డి విలేకరులకు చెప్పారు. మార్గమధ్యంలో కంటెయినర్‌ను అడ్డుకునేందుకు కార్యకర్తలు ప్రయత్నించగా, చోదకుడు వేగంగా వాహనాన్ని నడిపారన్నారు. దీంతో అనుమానం వచ్చి వాహనాన్ని వెంబడించి, ఆదివారం ఉదయం జగన్నాథపూర్‌ సమీపాన అడ్డుకున్నామన్నారు. చోదకుడు కార్యకర్తలపై పదునైన ఆయుధంతో దాడికి ప్రయత్నించాడని రెడ్డి ఆరోపించారు. ఈ అక్రమ రవాణాకు బాధ్యులైన వారిపై కఠిన చర్యలు తీసుకోవాలని ఆయన డిమాండు చేశారు. గోమాంసం ఖుర్దా నుంచి విశాఖపట్నం (ఆంధ్ర) రవాణా చేస్తున్నట్లు కంటెయినర్‌ చోదకుడు విలేకరులకు తెలిపాడు. భజరంగదళ్‌ కార్యకర్తల సమాచారం మేరకు ఛమ్మాఖండి ఠాణా పోలీసులు సంఘటనా స్థలానికి చేరుకున్నారు. గోమాంసం ప్యాకెట్లు, కంటెయినర్‌ను స్వాధీనం చేసుకున్నామని, చోదకుడ్ని అదుపులోకి తీసుకుని, దర్యాప్తు చేస్తున్నామని ఛత్రపురం ఎస్డీపీవో గౌరహరి సాహు విలేకరులకు తెలిపారు.