గంజాయి రహిత జిల్లాగా తీర్చిదిద్దడమే లక్ష్యం

వివరాలు వెల్లడిస్తున్న జిల్లా అదనపు ఎస్పీ సౌజన్య

నెల్లూరు(నేర విభాగం), న్యూస్‌టుడే: గంజాయి రహిత జిల్లాగా తీర్చిదిద్దడమే లక్ష్యమని జిల్లా అదనపు ఎస్పీ సీహెచ్‌ సౌజన్య అన్నారు. ఆదివారం ‘ఈనాడు’లో ‘గంజాయి గుప్పు.. ఏదీ కనువిప్పు’ పేరుతో కథనం ప్రచురితమైంది. ఈ కథనానికి స్పందించిన పోలీసులు ఆదివారం నగరంలో దాడులు చేపట్టారు. వివరాలను రాత్రి స్థానిక ఉమేష్‌చంద్ర కాన్ఫరెన్స్‌ హాలులో జిల్లా అదనపు ఎస్పీ వెల్లడించారు. నెల్లూరు గ్రామీణ మండలం గుడిపల్లిపాడుకు చెందిన రంజిత్‌నాయక్, బుధానాయక్, రబీనాయక్‌లను ఆత్మకూరు బస్టాండు వద్ద అదుపులోకి తీసుకుని.. వారి వద్ద 8.430 కిలోల గంజాయిని స్వాధీనం చేసుకున్నారు. వీరు గతలో నెల్లూరు గ్రామీణ మండలం కొత్త కాలువ సెంటరులోని రైస్‌మిల్లులో పనిచేస్తూ అక్కడే గంజాయి విక్రయించే వారు. ఒడిశాలోని కందమహల్‌ జిల్లా పుల్బాని పట్టణ సమీపంలో కేంజుర్‌కు చెందిన సూరజ్‌ వద్ద గంజాయి కొనుగోలు చేసినట్లు దర్యాప్తులో వెల్లడించారు. డీఎస్‌ఈవో పోలీసు టీం సిబ్బందిని, నెల్లూరు-1 సెబ్‌ స్టేషన్‌ సిబ్బందిని, ఈఎస్‌ను ఎస్పీ అభినందించినట్లు అదనపు ఎస్పీ పేర్కొన్నారు.