యాదాద్రిలో ఘనంగా లక్ష పుష్పార్చన

మంగళవారం సాయంత్రం నిర్వహించిన అలంకార సేవోత్సవం

యాదగిరిగుట్ట, న్యూస్‌టుడే: ఏకాదశి పర్వదినం సందర్భంగా మంగళవారం యాదాద్రి పంచనారసింహుల పుణ్యక్షేత్రంలో విశేష ఆరాధనలు నిర్వహించారు. గర్భాలయంలో మూలవరులను కొలుస్తూ పంచామృతంతో అభిషేకం చేపట్టిన పూజారులు తులసీ దళాలతో అర్చన నిర్వహించారు. శ్రీలక్ష్మీనరసింహస్వామి దర్శనమూర్తులకు సువర్ణ పుష్పార్చన జరిపారు. ఆలయ మహాముఖ మండపంలో యజ్ఞమూర్తులను ఆరాధిస్తూ ఏకాదశి వేడుకగా లక్ష పుష్పాలతో ప్రత్యేక అర్చన చేపట్టారు. వేద, మంత్ర పఠనంతో గంటన్నర పాటు కొనసాగిన ప్రత్యేక అర్చనలో పలువురు భక్తులు, ఆలయ ఈవో భాస్కర్‌రావు పాల్గొని ఆశీస్సులు పొందారు. నిత్యారాధనలో భాగంగా అష్టభుజి మండప ప్రాకారంలో శ్రీసుదర్శన నారసింహహోమం, శ్రీ లక్ష్మీనరసింహస్వామి కల్యాణోత్సవం నిర్వహించి, కల్యాణమూర్తులను గజవాహనంపై అలంకృతులను చేసి సేవా పర్వాన్ని చేపట్టారు. సాయంత్రం అలంకార సేవలను మంగళ వాయిద్యాల మధ్య నిర్వహించారు. రాత్రి స్వయంభువులను కొలుస్తూ ప్రత్యేక ఆరాధన, సహస్రనామార్చన నిర్వహించారు. దర్బారు సేవోత్సవంలో నిత్యాదాయాన్ని వెల్లడించారు. వివిధ విభాగాల ద్వారా రూ.19,21,613 ఆదాయం చేకూరింది.