Nalgonda: గనుల వేలాన్ని నిరసిస్తూ కలెక్టరేట్ ఎదుట ధర్నా

భువనగిరి: ప్రభుత్వ రంగ సంస్థలను ప్రైవేటుపరం చేసే కేంద్ర ప్రభుత్వ విధానాలను నిరసిస్తూ కలెక్టరేట్ ఎదుట సీఐటీ ఆధ్వర్యంలో ధర్నా నిర్వహించారు. మంచిర్యాల జిల్లాలో శ్రావణపల్లిలో ఉన్న బొగ్గు గనులను కేంద్ర ప్రభుత్వం వేలంపాటలో ప్రైవేటు రంగానికి అప్పజెప్పాలని చూస్తుందని దీనిని వెంటనే ఆపాలని సీపీఎం జిల్లా కార్యదర్శి ఎండీ జహంగీర్ అన్నారు. సింగరేణిని ప్రైవేటీకరణ చేయబోమని బూటకపు మాటలు చెప్పి ఇప్పుడు  ప్రైవేటుపరం చేస్తే ఏమి మిగులుతుందని వారు ప్రశ్నించారు. తెలంగాణ భాజపా ఎంపీలు, ఎమ్మెల్యేలు దీనిపై నోరు మెదపకపోవడం దారుణమన్నారు. కేంద్ర మంత్రి కిషన్ రెడ్డి నేరుగా వేలంపాట నిర్వహించడం రాష్ట్ర అభివృద్ధి ప్రయోజనాలపై ఆయనకు దృష్టి లేదని వారు విమర్శించారు. రాష్ట్ర కమిటీ సభ్యులు కొండమడుగు నరసింహ, అనురాధ, జిల్లా కార్యదర్శివర్గ సభ్యులు మాటూరు బాలరాజు, దోనూరి నర్సిరెడ్డి, తదితరులు ధర్నాలో పాల్గొన్నారు.