విధుల్లో హెడ్‌ కానిస్టేబుల్‌ మృతి

యాదగిరి

సిద్దిపేట అర్బన్, న్యూస్‌టుడే: విధుల్లో ఉండగా హెడ్‌ కానిస్టేబుల్‌ గుండెపోటుతో మృతి చెందిన ఘటన సిద్దిపేట పట్టణ మూడో ఠాణాలో శనివారం రాత్రి చోటు చేసుకుంది. సిద్దిపేట అర్బన్‌ మండలం పొన్నాల గ్రామానికి చెందిన కూచనపల్లి యాదగిరి(50) పట్టణ మూడో ఠాణాలో విధులు నిర్వహిస్తున్నాడు. శనివారం రాత్రి విధుల్లో ఉండగా రాత్రి 12గంటల సమయంలో శ్వాస తీసుకోవడం ఇబ్బందికరంగా ఉందని తోటి ఉద్యోగి కానిస్టేబుల్‌ రాజుకు తెలిపాడు. వెంటనే వారు వాహనంలో సిద్దిపేట ప్రభుత్వ ఆసుపత్రికి తరలించారు. పరీక్షించిన వైద్యులు అప్పటికే గుండెపోటుతో మృతి చెందాడని ధ్రువీకరించారు. యాదగిరికి భార్య సుజాత, కుమారుడు, కుమార్తె ఉన్నారు. భార్య ఫిర్యాదు మేరకు కేసు నమోదు చేసినట్లు పోలీసులు తెలిపారు. అంత్యక్రియలను పోలీసులు అధికారికంగా నిర్వహించారు. యాదగిరి మృతికి సీపీ అనూరాధ సంతాపం తెలిపారు. మృతదేహానికి అడిషనల్‌ డీసీపీ రామచందర్‌రావు, ఏసీపీ మధు, సీఐ విద్యాసాగర్, పోలీసులు నివాళులర్పించారు.