ఉపాధ్యాయుల కోసం విద్యార్థుల రాస్తారోకో

గవ్వలపల్లి-రామాయంపేట ప్రధాన రహదారిపై రాస్తారోకో చేస్తున్న విద్యార్థులు

చిన్నశంకరంపేట, న్యూస్‌టుడే: పాఠశాల ప్రారంభమై పదిహేను రోజులు గడుస్తున్నా.. పాఠాలు చెప్పేందుకు గురువులు లేరని విద్యార్థులు, వారి తల్లిదండ్రులు ఆందోళనకు దిగారు. చిన్నశంకరంపేట మండల పరిధి శాలిపేటలోని జడ్పీ ఉన్నత పాఠశాలలో 6 నుంచి 10 వరకు తరగతులు ఉన్నాయి. ఉపాధ్యాయుల ఖాళీలను భర్తీ చేయకపోవడంతో శుక్రవారం పాఠశాల ముందు గవ్వలపల్లి-రామాయంపేట ప్రధాన రహదారిపై రెండు గంటలకుపైగా రాస్తారోకో చేపట్టి వంటావార్పు నిర్వహించారు. టీచర్స్‌ కావాలని ప్లకార్డులు పట్టుకొని నిరసన వ్యక్తం చేశారు. నేటికీ హిందీ, భౌతిక, జీవ, సాంఘీక శాస్త్రం ఉపాధ్యాయులు లేకపోవడంతో ఇతర పాఠశాల నుంచి పిలిపించి పాఠాలు బోధిస్తున్నారని వాపోయారు. విద్యా వాలంటీర్లతో బోధించడంతో ఉత్తీర్ణత తగ్గిపోయిందని తల్లిదండ్రులు తెలిపారు. పాఠశాలలో మౌలిక సదుపాయాలు కూడా లేవని ఆవేదన వ్యక్తం చేశారు. విషయం తెలుసుకున్న ఎంఈవో బుచ్చయ్య నాయక్, కాంప్లెక్స్‌ హెచ్‌ఎం భాస్కరరావు పాఠశాలకు వెళ్లి విచారణ చేపట్టారు. ప్రస్తుతం ఉపాధ్యాయుల బదిలీల ప్రక్రియ కొనసాగుతోందని, 15 రోజుల్లో సర్దుబాటు చేసి పాఠశాలకు పంపిస్తానని ఎంఈవో తెలిపారు. ఉన్నతాధికారులతో మాట్లాడి యుద్ధ ప్రాతిపదికన మరుగుదొడ్లు, వంటశాల గది, ప్రహరీ నిర్మాణ పనులు ప్రారంభించేలా చర్యలు తీసుకుంటానని హామీ ఇచ్చారు.

విద్యార్థులతో మాట్లాడుతున్న ఎంఈవో బుచ్చయ్యనాయక్‌