బడికి వెళ్లిన బాల వధువు

ఉపాధ్యాయులు ఇచ్చిన సమాచారంతో వరుడిపై పోక్సో కేసు

గండీడ్, న్యూస్‌టుడే : బాలికను వివాహం చేసుకున్న యువకుడిపై పోక్సో కేసు నమోదైన ఘటన గండీడ్‌ మండలంలో చోటు చేసుకుంది. ఎస్సై శేఖర్‌రెడ్డి కథనం ప్రకారం.. గండీడ్‌ మండలంలోని ఓ గ్రామానికి చెందిన యువకుడు బీరప్ప ఆరో తరగతి చదివే అదే గ్రామానికి చెందిన బాలికను గత నెలలో వివాహం చేసుకున్నాడు. గత నెలలో పాఠశాలలు ప్రారంభం కాగా వారం క్రితం బాలిక తరగతులకు హాజరయ్యేందుకు వెళ్లింది. ఆమెకు వివాహమైనట్లు గుర్తించిన ఉపాధ్యాయులు స్త్రీ, శిశు సంక్షేమ శాఖ అధికారులకు సమాచారం అందించారు. అధికారులు విచారణ చేపట్టారు. ఛైల్డ్‌ వెల్ఫేర్‌ అధికారిణి రాధిక ఫిర్యాదు మేరకు బాలికను స్టేట్‌ హోంకు తరలించి వివాహం చేసుకున్న యువకుడితో పాటు సహకరించిన కుటుంబ సభ్యులపై ఛైల్డ్‌ మ్యారేజ్‌ యాక్ట్, పోక్సో చట్టం కింద కేసు నమోదు చేసినట్లు ఎస్సై తెలిపారు.