ఏడు తరగతులు.. ఒకే టీచర్‌

విద్యార్థులకు బోధిస్తున్న ఉపాధ్యాయిని రజిత

వనపర్తి జిల్లా కొత్తకోట మండలం రామకృష్ణాపురం ప్రాథమికోన్నత పాఠశాలలో 1 నుంచి 7 తరగతి వరకు 100 మంది విద్యార్థులు అభ్యసిస్తున్నారు. గతంలో ఇక్కడ ఆరుగురు ఉపాధ్యాయులు ఉండేవారు. ఆరేళ్ల క్రితం సాంఘికశాస్త్రం బోధించే ఉపాధ్యాయుడు పదవీవిరమణ చేశారు. హిందీ ఉపాధ్యాయుడు రెండేళ్లుగా కొత్తకోటలో డిప్యూటేషన్‌పై విధులు నిర్వహిస్తున్నారు. మిగిలిన నలుగురిలో ఇటీవల జరిగిన బదిలీల్లో ముగ్గురు ఇతర ప్రాంతాలకు వెళ్లిపోయారు. ప్రస్తుతం రజిత అనే ఉపాధ్యాయిని విధులు నిర్వహిస్తున్నారు. ఇక్కడికి వీపనగండ్ల మండలం నుంచి ఒక ఉపాధ్యాయుడు బదిలీపై రావాల్సి ఉండగా.. రిలీవర్‌ రాకపోవడంతో ఆయన అక్కడే ఉన్నారు. డిప్యూటేషన్‌పై విధులు నిర్వహిస్తున్న ఉపాధ్యాయుడు బదిలీ అయ్యారు. ప్రస్తుతం పాఠశాలలో 100 మంది విద్యార్థులను ఉపాధ్యాయిని బోధిస్తున్నారు.

 న్యూస్‌టుడే, కొత్తకోట గ్రామీణం