రైలు కిందపడి తండ్రి, కుమార్తె ఆత్మహత్య

మహబూబ్‌నగర్‌ పట్టణం, న్యూస్‌టుడే : రైలు కిందపడి తండ్రి, కుమార్తె ఆత్మహత్యకు పాల్పడిన ఘటన మహబూబ్‌నగర్‌ రైల్వే పోలీస్‌ స్టేషన్‌ పరిధిలో చోటు చేసుకుంది. రైల్వే ఎస్సై సయ్యద్‌ అక్బర్‌ కథనం ప్రకారం.. మహబూబ్‌నగర్‌లోని ఎస్వీఎస్‌ ఆస్పత్రిలో వికారాబాద్‌ జిల్లా చౌడాపూర్‌ మండలం మందిపల్‌కు చెందిన కె.శివానంద్‌(50) కారు డ్రైవరుగా, ఆయన కుమార్తె చందన(20) ల్యాబ్‌ టెక్నీషియన్‌ పనిచేస్తున్నారు. కొన్నాళ్లుగా వారు కుటుంబ సభ్యులతో కలిసి ఏనుగొండలోని శ్రీరాం కాలనీలో నివాసం ఉంటున్నారు. సోమవారం రాత్రి శ్రీరాం కాలనీ సమీపంలోని రైలు పట్టాలపై శివానంద్, చందన గుర్తుతెలియని రైలు కిందపడి ఆత్మహత్యకు పాల్పడ్డారు. రాత్రి సమాచారం రావటంతో రైల్వే పోలీసులు సుమారు 12 గంటల ప్రాంతంలో మృతదేహాలను జనరల్‌ ఆస్పత్రి శవాగారానికి తరలించారు. ఆత్మహత్యకు కుటుంబ కలహాలే కారణమని భావిస్తున్నారు. కేసు నమోదు చేసుకుని దర్యాప్తు చేస్తున్నట్లు ఎస్సై తెలిపారు.