Mahbubnagar: ఆలయ సమీపంలో గుప్త నిధుల తవ్వకాలు

రాజోలి: రాజోలి శివారులోని తుంగభద్ర నది మధ్యలో ఉన్న ప్రాచీన రామప్ప స్వామి ఆలయ సమీపంలో గుప్త నిధుల కోసం తవ్వకాలు జరిగాయి. ఇక్కడ జనజీవనం లేకపోవడంతో కొందరు వ్యక్తులు నది దాటి వెళ్లి ఆలయం ముందు రెండు చోట్ల నిధుల కోసం తవ్వకాలు జరిపారు. తవ్వకాలకు ముందు పరిసరాల్లో పూజలు చేసిన ఆనవాళ్లు ఉన్నాయి. శనివారం ఉదయం పూజలు చేసేందుకు వెళ్లిన పూజారి గుప్త నిధుల కోసం తవ్వకాలు జరిగినట్లుగా గుర్తించారు. గతంలోనూ చాలా సార్లు తవ్వకాలు జరిపి ఆలయాన్ని శిథిలం చేశారని, ప్రస్తుతం దాతల సహకారంతో దేవాలయం బాగు చేసినట్లుగా పూజారి తెలిపారు.