పేదల కళ్లలో ఆనందం చూడటమే ప్రభుత్వ కర్తవ్యం

న్యాయ, మైనారిటీ సంక్షేమ శాఖ మంత్రి ఫరూక్‌

నంద్యాల పట్టణం నందమూరినగర్‌లో పింఛన్లు పంపిణీ చేస్తున్న మంత్రి ఫరూక్, తెదేపా నాయకులు

నంద్యాల పట్టణం, న్యూస్‌టుడే : పేదల కళ్లలో ఆనందం చూడటమే ప్రభుత్వ ప్రథమ కర్తవ్యమని రాష్ట్ర న్యాయ, మైనారిటీ సంక్షేమ శాఖ మంత్రి ఎన్‌ఎండీ ఫరూక్‌ పేర్కొన్నారు. జిల్లా కేంద్రం నంద్యాల పట్టణంలోని పలు వార్డుల్లో సోమవారం ఉదయం 6 గంటల నుంచే మంత్రి ఫరూక్‌ విస్తృతంగా పర్యటించారు. లబ్ధిదారుల ఇళ్ల వద్దకే వెళ్లి పింఛను సొమ్ము పంపిణీ చేశారు. పింఛన్ల పెంపుతో రాష్ట్ర ప్రభుత్వంపై అదనంగా రూ.819 కోట్ల భారం పడుతున్నా ప్రజా శ్రేయస్సు కోసం ఈ నిర్ణయం తీసుకున్నట్లు ఆయన చెప్పారు. గతంలో జగన్‌రెడ్డి ప్రభుత్వంలో ప్రభుత్వ స్కీములన్నీ స్కాములుగా మారాయన్నారు. కార్యక్రమంలో మాజీ మంత్రి ఏరాసు ప్రతాపరెడ్డి, తెదేపా రాష్ట్ర కార్యదర్శులు రామచంద్రరావు, తులసిరెడ్డి తదితరులు పాల్గొన్నారు.