Kurnool: ప్రజా సమస్యలపై దృష్టి సారించండి

బేతంచెర్ల: పట్టణ పరిధిలోని అన్ని వార్డుల్లో ప్రజలు ఎదుర్కొంటున్న సమస్యలపై సిబ్బంది దృష్టి సారించాలని నగర పంచాయతీ ఛైర్మన్ సీహెచ్ చలంరెడ్డి పేర్కొన్నారు. శనివారం బేతంచెర్ల పట్టణంలోని నగర పంచాయతీ కమిషనర్ రమేష్ బాబు అధ్యక్షతన మున్సిపల్ కౌన్సిల్ సమావేశం నిర్వహించారు. ఈ సమావేశంలో తెదేపా వార్డు కౌన్సిలర్లు అంజి, రాంగోపాల్, నంద్యాల కుమారి, విజయలక్ష్మి ఆయా వార్డుల్లో నెలకొన్న తాగునీరు, మరుగుదొడ్లు, వీధి దీపాల సమస్యలను ఛైర్మన్‌ దృష్టికి తెచ్చారు. వీలైనంత త్వరగా ఆయా సమస్యలను పరిష్కరించాలని కోరారు. దుర్గాపేట, సంజీవనగర్, వడ్డేపేట కాలనీల్లో నూతనంగా నిర్మించిన మరుగు దొడ్లకు కుళాయి కనెక్షన్ ఏర్పాటు చేసి వినియోగంలోకి తేవాలని కోరారు. హనుమాన్ నగర్ కాలనీలో వీధి లైట్లు ఏర్పాటు చేయాలన్నారు. ముచ్చట్ల నుంచి బేతంచెర్ల తాగునీటి పైపులైన్ ఏర్పాటు చేసేందుకు చర్యలు తీసుకుంటున్నట్లు ఛైర్మన్ చలంరెడ్డి తెలిపారు. కౌన్సిల్ సమావేశంలో అవాంఛనీయ సంఘటనలు జరుగుతాయనే ముందస్తు సమాచారంతో ఎస్సై శివశంకర్ నాయక్ బందోబస్తును ఏర్పాటు చేశారు.